DILI, STLTIMORLESTE.com – Estudantes feto nain rua husi eskola iha Munisipiu Ainaro, ho kondisaun gravida partisipa ezame nasional ba ano letivu 2024.
Lia hirak nee hatoo husi Diretor Edukasaun Munisipiu Ainaro, Patricio da Costa Magno ba STL liu husi telefone, Sesta nee (18/10/2024).
“Iha Munisipiu Ainaro, estudantes feto gravida nain rua, ida husi ensinu sekundariu jeral no ida seluk husi ensinu baziku, maibe sira iha direitu para bele tuir ezame nasional, tanba iha primeiru no segundu periodu nee sira partisipa iha ezame, nee duni maske sira nain rua ho kondisaun gravida, maibe ita fo oportunidade ba sira para bele tuir ezame, maibe ida ensinu baziku nee tuir ezame nasional iha loron segunda, tersa, maibe kuarta nee halai tiha ba Ermera no la tuir ona ezame ba loron tolu ninia,” nia dehan.
Nia hatutan, SEM Ainaro simu deit lista husi eskola sekundariu ida no ensinu baziku ida mak ninia estudantes feto gravida, ezame nasional iha Ainaro lao diak hela. Total estudantes neebe partisipa iha ezame nasional Ensinu Baziku hamutuk 1549, Ensinu Sekundariu Jeral 1113, tekvo 181, total Ensinu Baziku iku iha Ainaro 26, Sekundariu Jeral 6 no Tekvo 4.
“Iha Munisipiu Ainaro ezame lao ho diak, kada sala estudantes 20 no ita nian profesores vizilansia ba sira, nee duni ezame lao ho diak too ohin loron, ami mos ba observa ezame nee iha terenu, maibe buat hotu lao ho diak, ita nian estudantes sira mos hatene, dader mai sedu eskola para tuir ezame,” nia deklara.
Iha fatin seluk, Diretor Edukasaun Munisipiu Likisa, Julio da Silva hatete, antes nee no too agora kona-ba estudantes feto gravida seidauk iha informasaun, nee duni ba asuntu nee seidauk simu informasaun.
(jac)
