DILI, STLTIMORLESTE.com – Depois de ezame segundu periodu, estudantes sira feriadu durante semana rua resin no ohin hahu loron dahuluk estudantes sira tama fali eskola.
Haktuir Fundador Eskola Nobel da Paz, Jeremias P. de Jesus hatoo asuntu nee ba jornalista STL iha nia knaar fatin, Segunda nee (04/08/2025).
“Ita nian estudantes balun neebe mak foin daudaun ezame la kompletu karik, sira bele halo kompletu. Depois de ita nian estudantes sira halao ezame segundu periodu nee remata, sira tama kedas feriadu no ohin mak hanesan loron dahuluk estudantes sira tama fali eskola, halo limpeza iha sala de aula no areador eskola Nobel da Paz atu nunee aban ou bainrua estudantes sira bele hahu aula normal,” nia esplika.
Nia akresenta, ohin loron primeiru nee estudantes sira seidauk aula ida, maibe sira hamoos deit sala de aula, tanba semana rua resin estudantes sira la mai eskola, tanba feriadu, ohin mai sira hadia meza no kadeira sira iha aula laran.
“Semana ida nee ami nian estudantes sira hahu aula, maibe ohin ita nian estudantes balun deit mak mai eskola, maibe barak seidauk tama. Aban nunee estudantes balun deit mak mai mos ensinu aprendizajen tenke lao daudaun ona,” nia afirma.
ME Apoiu Livrus ba Departamentu 2
DILI, STLTIMORLESTE.com – Ministeriu Edukasaun (ME) apoiu livrus manual ba departamentu rua, iha Eskola Sekundáriu Téknika Vokasional ba Indústria no Teknólojia (ESTV-IT) 28 Novembru Bekora.
Tomas Pinto nudar Eskola Sekundáriu Téknika Vokasional ba Indústria no Teknólojia (ESTV-IT) 28 Novembru Bekora, Díli, ba jornalista STL iha nia knaar fatin Bekora, Segunda nee (04/08/2025).
“Livru manual estudantes sufisiente no agora daudaun mos Livru ba informatika no eletronika nian neebe mak agora daudaun iha hela Edukasaun Munisipiu Dili, tanba sei rai iha Edukasaun Munisipais so ami mak seidauk ba foti. Atu halo kompletu liu tan seidauk konta, tanba seidauk ba foti mai hamutuk dos 2, kada dos ida 50, nee duni dos rua nee kuazu 100, iha Edukasaun Munisipiu Dìli nian, Segunda ohin mak foin ba foti livrus nee,” nia komenta.
Iha fatin seluk, Charles F. Guterres hanesan Diretor Eskola Hotelaria no Turizmu Bekora dehan, kona-ba livrus manual sufisiente hela no sira nian eskola laiha problema ba livrus manual.
“Ami laiha problema kona-ba livrus manual, tanba ami nian livrus sufisiente hela, nee duni ami laiha problema ba livrus, ita nian livrus sira nee iha para bele fasilita estudantes sira bele asesu ba iha livrus sira nee,” nia haktuir.
Nunee mos Diretor Eskola Sekundariu nu. 4 Setembru Balide, Sergio A. da Cruz hatete, livrus manual ba materia balun seidauk iha no sira husu ba Ministeriu Edukasaun atu bele fo apoiu ba livrus neebe sira sei menus.
(jen)
