DILI, STLTIMORLESTE.com – Estudantes husi Eskola Baziku Filial (EBF) nu 5 Komoro seidauk asesu programa merenda eskolar.
Lia hirak nee hatoo husi Koordenador Eskola Baziku Filial (EBF) nu 5 Komoro, Marcelino Moniz ba STL, Tersa nee (27/01/2026).
“Too agora ita nian estudantes sira husi eskola ida nee seidauk asesu ba programa merenda eskolar no daudaun nee eskola mak sei jere programa merenda eskolar, maske uluk nee EJP sira mak jere merenda eskolar, maibe ba tinan nee husi eskola mak jere merenda eskolar, maibe tinan ida nee programa nee rasik seidauk lao,” katak nia.
Nia dehan, eskola hotu seidauk halao programa ida nee, tanba nee estudantes sira kada loron mai iha eskola maibe sira seidauk asesu programa merenda eskolar, tanba nee espera katak iha tempu badak nia laran estudantes sira bele asesu ona ba programa ida nee.
“Kona-ba osan konsesaun eskolar ba tinan ida nee ami seidauk hetan, maibe ami nian relatóriu hatama tiha ona, tanba antes atu hetan fali konsesaun ita tenke hatama uluk relatóriu hafoin mak bele simu fali konsesaun, konsesaun nee depende ba numeru estudantes, tanba kada estudantes sei hetan US$ 2,” nia haktuir.
Nunee mos Julio Sacadura nuudar Diretor Servisu Edukasaun Munisípiu Vikeke dehan, kona-ba programa merenda eskolar iha Munisipiu Vikeke seidauk lao iha eskola sira no tuir planu sei halao iha fulan Fevereiru tinan nee.
“Hau hanoin kona-ba programa merenda eskolar iha Munisipiu Vikeke seidauk lao iha eskola sira no tuir planu sei halao iha fulan Fevereiru tinan nee nian laran, nee duni agora daudaun ita nian estudantes sira seidauk asesu ba merenda eskolar,” nia dehan.
(jac)
