DILI, STLTIMORLESTE.com – Eskola Baziku Sentral (EBC – sigla português) Manleuana sempre apela ba estudantes sira, oinsa mak tau lixu iha fatin neebe prepara ona.
Kestaun nee hatoo husi Diretor EBCA Manleuana, Carlos Correia ba jornalista STL iha nia knaar fatin Manleuana, Kinta nee (31/07/2025).
“Durante nee ami nian estudantes sira iha eskola ida nee, sira sempre tau lixu iha fatin neebe mak prepara ona, nunee ita bele evita lixu iha eskola, oinsa mak eskola nee iha ambiente neebe mak moos, tanba ita hotu hatene katak ita tenke fo hanoin nafatin ba ita nian estudantes sira, karik han buat ruma iha eskola, sira hatene ona tau aqua, plastik, nee sira tau iha fatin neebe prepara ona,” nia afirma.
Carlos dehan, estudantes sira halo limpeza no presiza iha sala de aula mos tenke moos para estudantes sira bele partisipa prosesu aprendizajen ho diak liu tan, ho ida nee estudantes sira iha konsiénsia tau lixu iha fatin no sira sempre halo limpeza iha areador eskola nian.
Iha parte seluk, Diretor EBC 10 Dezembru Komoro, Calistro A. Guterres hatete, estudantes sira nee han merenda eskolar, maibe komunidade sira nee faan tan nasi kotak, husi ida nee mak aumenta lixu iha sira nian eskola, tanba estudantes sira han hotu la tau kotak nee nia fatin, maibe estudantes sira halo limpeza iha eskola.
“Difikuldade neebe mak ami enfrenta mak primeiru kona-ba lixu, tanba kada tinan ami sempre halerik ba limpeza nee, liu-liu ami nian estudantes sira dader mai eskola tenke halo limpeza, primeiru komunidade sira halo negosiu iha areador eskola, segundu ami nian eskola besik merkadu, liu-liu sira neebe faan hahan iha eskola, ida nee bele aumenta lixu iha eskola,” nia haktuir.
(jac)
