DILI, STLTIMORLESTE.com – Estudantes mai eskola atu aprende no husu estudantes husi Eskola Sekundariu Jeral FINANTIL no Sekundariu 10 Dezembru tenke hakribi violensia.
“Hau hanoin laos ezame hotu estudantes FINANTIL ho 10 Dezembru atu haree malu la diak, hau hanoin nee para ona, tanba imi laos ema seluk, imi mesak bandeira RDTL nia oan hotu, tanba ho vizita espesiál husi Visi PM nian mai ona iha eskola rua FINANTIL ho 10 Dezembru, liu husi dialogu neebe mak halo ona iha eskola rua nee atu bele prevene konflitu sira nee, tanba Visi PM apela ona ba estudantes husi eskola rua ninia katak, imi mak joven ba futuru ninia,” dehan Diretor Eskola Sekundariu FINANTIL, Aniceto Berlelo ba jornalista STL iha nia knaar fatin Aimutin, Tersa nee (15/07/2025).
Nia dehan, oinsa mak estudantes husi eskola rua nee bele hases aan husi konflitu neebe mak atu prejudika ba estudantes sira nian estudu, oinsa mak aprende no esforsu aan estuda, atu nunee sai jerasaun neebe iha kualidade diak no hakribi husi violensia. Hanesan Diretor Eskola kada loron sempre fo hanoin ba estudantes husi eskola FINANTIL katak, mai eskola atu estuda.
“Ita husu nafatin ba ita nian estudantes sira, nuudar jerasaun foun tenke estuda no aprende, tanba kada loron imi partisipa iha aula, oinsa mak imi atu kria paz, tanba imi mak futuru ba rai ida nee, entaun tenke evita aan husi problema,” nia informa.
“Mai iha eskola atu aprende, estuda no fila ba uma ho diak, hodi familia mos kontente, nunee mai eskola para atu tuir aula no remata fila ba uma ho diak, tanba loron mai eskola nee atu buka aprende,” katak nia.
Nunee mos Diretor Eskola Sekundariu Jeral 10 Dezembru Komoro, Manuel Verdial dehan, estudantes mai iha eskola lori kadernu no lapijeira atu aprende, laos lori fatuk halo violensia ba malu no husu estudantes sira hadook aan husi konflitu.
(jac)
