DILI, STLTIMORLESTE.com – Komisariu Komisaun Anti Korrupsaun (KAK), Rui Pereira hatete, kona-ba progresu neebe antes nee KAK halo ona, ida mak kona-ba estudu arendamentu rai no uma estadu, neebe ikus mai hatama reseitas ba iha estadu.
“Uluk Komisariu asumi kargu hanesan Adjuntu Komisariu KAK, estudu lubuk ida mak ita halo ona kona-ba arendamentu rai Estadu, halo ba iha Munisipiu Bobonaro no mos Dili, nia rezultadu lubuk ida mak ita hetan progresu,” dehan Komisariu KAK, Rui ba jornalista sira iha Edefisiu KAK, Kinta (21/11/2024).
Nia fo ezemplu iha Bobonaro, ema tinan rua tolu abandona hela sira nia obrigasaun halo arendamentu ba Estadu, no KAK ba halo peskiza no estudu sira hatudu katak, KAK ba halo estudu sira tauk no idak-idak komesa ba selu fali sira nia obrigasaun nuudar arendatariu.
Tanba uluk informasaun neebe simu halo peskiza, kuaze inkam arendamentu 30 mil ate 40 mil ital, iha Bobonaro nian. No iha Dili nian rezultadu husi estudu nee, lubuk ida mak hahu ona sira nia obrigasaun, tanba KAK mos iha neeba hateten sira neebe la kumpri, KAK mos bele rekomenda atu hakotu arendamentu rai no uma Estadu nian, tanba valor arendamentu boot tebes.
Nunee ho KAK nia estudu nee atu fo hanoin ba publiku katak, utilizasaun sasan estadu halo arendamentu, sira nudar arendatariu tenke iha obrigasaun hodi selu.
“Ba oin sei haree arendatariu sira nee ohin loron lao hotu ka, balu la lao, se balu la lao prosesu seluk sei hasoru, ”dehan Rui.
Iha fatin ketak, Komunidade Suku Komoro, Tomas Martins dehan, durante nee ema barak mak halo arendamentu ba rai no uma Estadu, maibe la kumpri sira nia obrigasaun.
“Ita haree iha ema balu preokupa beibeik kona-ba ida nee, maibe atu hahalok sira nee labele akontese tan, kuandu haree ema neebe la kumpri nia obrigasaun tenke kria sansaun ruma ba nia,” dehan nia.
(ter)
