DILI, STLTIMORLESTE.com – Kompanhia Internasional British Wood durante halao estudu konseitu iha fulan Abril too Novembru 2024 katak, projetu Greater Sunrise oportunidade dezenvolve iha Timor Leste (TL).
Xefe Bankada CNRT, Duarte Nunes hatete, fo klareza Greater Sunrise sei mai TL, neebe ho rezultadu estudu Kompanhia Internasional nee halo, klaru katak ema bele kestiona, maibe Greater Sunrise sei mai, kestaun atu bainhira- bainhira, maibe sei mai TL.
“Atu dada Greater Sunrise mai nee, ita hotu hatene katak, ema hotu nia hakarak, durante nee luta atu dada Greater Sunrise mai Timor Leste”, katak Xefe Bankada CNRT, Duarte ba STL liu husi telefone, Segunda (23/12/2024).
Nia dehan, klaru katak kadoras tenke mai TL, tanba nee durante ema sira kestiona no lá fiar katak atu dada mai nee, maibe ho estudu konsetual husi Kompanhia British Wood, katak dezenvolvimentu projetu Greater Sunrise nian, oportunidade atu dezenvolve iha TL, ida nee bele fo klareza liu tan katak, durante luta PM Xanana nian dezde inisiu mai too agora hakarak duni lori Greater Sunrise mai Timor Leste.
Deputadu nee fiar katak ho dezenvolve Greater Sunrise mai TL sei lori mudansa signifikativu ba ekonomia TL.
Entretantu tuir dadus neebe jornalista STL asesu iha pájina ofisial Xanana ba ema hotu, no Portal do Governo de Timor Leste hatete, estudu konseituál independente kona-ba dezenvolvimentu Greater Sunrise nian, neebé halao husi Kompanhia British Wood entre fulan Abril too Novembru 2024, konfirma katak dezenvolvimentu projetu Greater Sunrise nian ho oportunidade atu dezenvolve iha Timor Leste no ida neebé viavel liu no fó vantajen ba país, hodi asegura benefísiu ekonómiku no sosiál neebe signifikativu.
Estudu husi Kompanhia British Wood, fo opsaun prinsipál dezenvolvimentu haat – Gas Natural Liquefied Timor Leste (TLNG – Gás Natural Liquefeito de Timor-Leste), Darwin LNG (DLANG), Ichthys LNG no instalasaun foun LNG iha Australia. Opsaun hotu-hotu tékniku konsidera viavel, ho sira nia risku asosiadu maibé ekivalente.
Opsaun TLNG nee subliña liu husi provizaun kustu operasionál menus (OPEX) no liu husi fasilidade atu halo retornu jerál, direta no indireta neebé diak liu ba Timor-Leste, sei kria impaktu sosio-ekonomiku boot ida ba nasaun nee.
Opsaun nee mós fó impaktu pozitivu liu ba Produtu Brutu Internu (PIB) no kriasaun empregu, i mós retornu liu ba Konsorsiu Dezenvolvimentu Greater Sunrise (Sunise Joint Venture). Tuir estudu nee, TLNG mós bele hetan retornu diretu diak liu ba Austrália.
Wood ho esperiénsia boot iha estudu sustentabilidade gás naturál globál, uza rekizitu rigorozu hodi análize enjeñaria, teknolojia, finansiamentu, estrutura komersiál sira, nunee mós impostu, ambiente, saúde no seguransa, no impaktu sosio-ekonomiku sira.
Primeiru Ministru Timor Leste no Austrália, Kay Rala Xana Gusmão no Anthony Albane iha deklarasaun konjunta ida nebé fó sai iha loron Sabadu, 21 fulan Dezembru, afirma fali kompromisu nasaun rua nee nian atu asegura katak dezenvolvimentu kampu Greater Sunrise nian iha Timor Leste lori benefísiu ba tempu naruk ba povu Timor Leste.
Kampu gás Greater Sunrise nian iha tasi ibun Timor Leste nia parte súl besik 140 km. Konsorsiu neebé responsavel ba dezenvolvimentu kampu Greater Sunrise (Sunrise Joint Venture) no kompostu husi Timor GAP, neebé kaer 50.6%, Woodside, ho 33.44%, no Osaka Gas Austrália, ho 10%.
(gui)
