DILI, STLTIMORLESTE.com – Eskola Sekundáriu Téknika Vokasional ba Indústria no Teknólojia (ESTV-IT) 28 Novembru Bekora hadia sala aprendizajen tolu (3) ba estudantes sira.
Haktuir Diretor Eskola Sekundáriu Téknika Vokasional ba Indústria no Teknólojia (ESTV-IT) 28 de Novembru Bekora, Tomas Pinto ba jornalista STL iha nia knaar fatin Bekora, Segunda nee (23/06/2025).
“Ami husi eskola ESTV-IT 28 Novembru Bekora hadia sala de aulas hodi monta fila fali odamatan foun, sala de aula 3 no odamatan 6 mak hadia, janela sei tau redi hotu. Nee uza hotu osan konsensaun eskolar. Ida nee hasae batako hodi sata netik inundasaun bainhira udan monu rai,” dehan nia.
Nia dehan, tanba tinan-tinan sempre mosu inundasaun tama too sala laboratoriu arte grafika no sala de aulas hodi prejudika prosesu aprendizajen, keramik iha ona hein odamatan no janela deit.
“Realidade mak nee, odamatan iha ona mais janela seidauk. Hadia oituan-oituan tuir kbiit orsamentu nia montante tanba ami nia alunus foin 409 pesoas nia osan atu hola no fahe ba reparasi kiik tuir manual haruka seidauk sufisiente,” nia dehan.
Iha fatin seluk, Diretor Nasional Ensinu Sekundariu no Tekniku Vokasional, Fernando Mouzinho Gama hatete, kondisaun eskola tekvo balun presiza aumenta sala de aula ba estudantes sira, inklui apoiu fasilidade ba estudantes sira, sala de aula balun presiza halo reabilitasaun.
“Kona-ba ita nian kondisaun eskola tekvo balun presiza aumenta sala de aula ba estudantes sira, inklui apoiu fasilidade ba estudantes sira, sala de aula balun presiza halo reabilitasaun,” dehan nia.
(jac)
