DILI, STLTIMORLESTE.com – Eskola Sekundáriu Téknika Vokasional ba Indústria no Teknólojia (ESTV-IT) 28 de Novembro Becora-Díli (ESTV-IT) atu simu estudantes foun sei hein informasaun husi Ministériu Edukasaun (ME).
Haktuir Diretor Eskola Sekundáriu Téknika Vokasional ba Indústria no Teknólojia (ESTV-IT) 28 de Novembro Becora-Díli, Tomas Pinto ba STL, Tersa (02-12-2025).
“Ami seidauk bele simu estudantes foun, tanba sei iha informasaun husi Diresaun ESTV ME nian.Tuir planu eskola ESTV-IT 28 mak presiza alunos 360. Ami iha departmentu 4 nee mak hanesan departamentu eletricidade, Eletronica, informática no Arte Grafica,” dehan nia.
Tuir Tomas katak, atu simu estudantes foun sira sei hein informasaun husi diresaun ensinu tekvo ME nian, bainhira simu ona informasaun mak sira sei simu estudantes foun, tuir departamentu hat neebe mak dadaun nee eziste iha sira nian eskola refere.
“Ami simu estudantes haree ba ami nian fasilidade neebe mak iha, maibe agora dadaun ami seidauk simu estudantes foun,tanba ami sei hein informasaun husi parte Ministériu Edukasaun liu husi diresaun ensinu tekvo ninia,” nia informa.
Nunee mos Direitur Eskola Hotelaria e Turizmu Becora, Charles F. Guterres dehan, Eskola Hotelaria e Turizmu Becora sei simu estudantes foun 120, husi numeru nee fahe ba iha departamentu hat neebe eziste iha eskola refere ba kada departamentu estudantes 40.
“Ami simu estudantes foun iha loron 15 de Dezembro tinan nee,tuir planu neebe mak ami iha 1tes foun hamutuk 120,ami nian planu mak ami sei simu estudantes foun neebe mak ninia numeru ohin hau mensiona nee,” nia informa.
Jornalista: Jacinta Sequeira
Editora: Domingas Gomes
