DILI, STLTIMORLESTE.com – Ministeriu Edukasaun (ME) liu husi Diresaun Ensinu Tekniku Vokasional (ESTV) sei koopera ho parte INFORDEPE, atu nunee bele fasilita formasaun ba profesores iha area produtivu nian.
Kestaun nee hatoo husi Diretor Nasional Ensinu Tekniku Vokasional, Fernando Mouzinho Gama ba STL, Kuarta nee (25/02/2026).
“Formasaun profesores iha area produtivu sira nee agora ita halo kooperasaun ho INFORDEPE, tanba sira mak sei halo formasaun ba ita nian profesores sira iha area produtivu ninia. Ita mos sei halo esforsu koopera ho ita nian parseiru balun neebe iha esperiensia balun para sira bele fo formasaun ba ita nian profesores sira, hodi bele aumenta konhesimentu neebe diak ba ita nian profesores sira,” nia esplika.
Iha fatin seluk, Diretor Nasional Ensinu Sekundariu iha ME, Benjamin Gomes da Cruz Fernandes hatete, durante nee profesores sira neebe hanorin iha nivel sekundariu nee sira hetan formasaun kada tinan husi INFORDEPE.
“Hau hanoin kada tinan nee ita nian profesores sira partisipa formasaun kona-ba lingua português, nee husi INFORDEPE mak fo ba sira, dadus kompletu nee ita boot sira bele foti iha INFORDEPE, tanba sira mak iha dadus neebe kompletu,” dehan Benjamin.
Nia dehan, nee duni liu husi formasaun lian português neebe profesor sira tuir iha progresu neebe diak, hodi nunee sira bele uza lingua nee ba iha prosesu ensinu aprendizajen ba estudantes sira, tanba formasaun nee importante tebes hodi bele aumenta konhesimentu profesores sira.
(jac)
