DILI, STLTIMORLESTE.com – EAST Timor Coffee Institute (ETCI) hahu prepara ona lista finalista graduasaun nian atu submete ba iha Ministeriu Ensinu Superior Siensia no Kultura (MESSK).
Haktuir Reitor EAST Timor Coffee Institute (ETCI), Mateus Maia de Jesus ba STL iha nia knaar fatin, Tersa nee (11/03/2025).
“Agora daudaun ami foin prepara ami nian lista estudantes finalista atu submete ba iha MESSK, agora sei iha faze prepara hela dadus, atu submete nee depende ba iha instituisaun, tanba nee mak daudaun nee ami prepara ona lista finalista hirak neebe atu halao graduasaun ba tinan ida nee,” dehan nia.
Mateus dehan, ETCI hahu prepara lista estudantes finalista atu submete ba MESSK, ho total sira nian estudantes finalista sira hamutuk 150 mak sei halao graduasaun iha fulan Maiu tinan nee nian laran.
“Husi numeru neebe mak ohin hau mensiona kompostu husi fakuldade tolu mak hanesan fakuldade agrikultura, edukasaun no ekonomi, fakuldade tolu nee ninia departamentu sia. Agora daudaun lista ami prepara ona atu submete ba MESSK, tanba nee ami sei submete lista ida nee iha fulan Marsu,” katak nia.
Nia hatutan, nee duni bainhira hatama ona lista hodi hein ba iha graduasaun ba finalista hirak neebe remata sira nian estudu. Tanba nee, antes hatama lista, husi instituisaun tenke prepara ninia lista uluk molok submete ba ministeriu.
Nunee mos Reitor ISC, Sebastião Perreira dehan, Cristal halao graduassun iha fulan Dezembru tinan 2024, maibe antes halo graduasaun submete ninia lista estudantes finalista nee ba Ministeriu Ensinu Superior.
“Ami halao tiha ona graduasaun ba ami nian finalista sira iha fulan Dezembru tinan 2024, antes ami halo graduasaun ami haruka uluk naran estudantes finalista ba Ministeriu Ensinu Superior,” nia dehan.
(jac)
