DILI, STLTIMORLESTE.com – EAST Timor Coffee Institute (ETCI) hahu simu estudante foun ba iha faze primeiru no faze segundu, tanba tuir planu ETCI sei simu estudante foun hamutuk 300.
“Ami simu estudante foun hanesan baibain, nee duni agora daudaun ba faze daruak ninia ami simu hela estudantes foun, nee duni segundu faze ninia agora daudaun ami simu ona estudante foun hamutuk 80 no faze primeiru nian ami simu ona estudantes 50, tuir ami nian planu sei simu estudante foun hamutuk 300,” dehan Reitor EAST Timor Coffe Institute (ETCI), Mateus Maia de Jesus ba STL iha nia knaar fatin, Kuarta nee (19/02/2025).
Nia hatutan, ETCI sei simu estudantes ba faze primeiru no segundu deit, faze terseiru laiha, nee duni faze primeiru halao tiha ona, agora daudaun tama iha faze segundu ninia, neebe sei simu hela estudantes foun.
“Ami simu estudantes foun ba iha fakuldade tolu mak hanesan fakuldade agrikultura, edukasaun no fakuldade ekonomi, ho ninia departamentu sia, tanba nee ba ano letivu tinan nee ami simu ona estudantes foun,” tenik nia.
Mateus akresenta, nee duni kada loron ETCI sei simu estudantes foun ba faze daruak ninia, estudantes neebe hakarak mai tama iha ETCI nee, sira sei simu, tanba faze daruak nian sei loke hela.
Nunee mos Reitor ICS, Sebastiao Perreira hatete, sira seidauk simu estudantes foun, kona-ba simu estudantes foun ba tinan nee sira seidauk simu.
(jac)
