DILI, STLTIMORLESTE.com – Primeiru Ministru, Kay Rala Xanana Gusmão hatete, relasiona ho politika Governu Estadu Unidos Amerika (EUA) nebee aplika taxa importasaun 10% ba produtu sira iha Timor Leste (TL), ida nee laiha problema ho importasaun no esportasaun, maibe TL preokupa liu ho dolar.
Xefe Governu dehan, politika Governu EUA neebe aplika taxa importasaun 10% ba Timor Leste laiha problema, maibe preokupa liu mak ho osan dolar, bainhira dolar tun tenke dada sintu metin.
Tanba povu Timor Leste sosa buat ruma husi Amerika no Timor la faan buat ruma ba Amerika, tanba buat neebe PM rasik han hemu nee husi Indonezia.
“Hau nia problema mak ida nee deit, kona-ba ita nia ekonomia hau mos nunka estuda ekonomia imi hatene hau nee sempre makan asam SMA, hau la hatene saida mak ekonomia, maibe kona-ba politika neebe agora halao daudaun husi sua exelensia Prezidente Trand, ba ita preokupa mak ida nee deit, dolar sae ou dolar tun, momentu ida nee parase ke US$ 1 kona 17 ribu rupiah neebe ita ladun tun, maibe ita haree ba ita nia ekonomia dehan esporta, importa, karik ita nia liu ho Indonezia se US$ 1 kona 17 ribu rupiah, signifika ita bele importa tan buat ruma,” dehan PM, Xanana ba jornalista sira, bainhira remata halao enkontru semanal ho Prezidente Republika, Jose Ramos Horta iha Palasiu Prezidensial, Nicolau Lobato, Bairo Pite, Dili, Kinta (10/04/2025).
PM Xanana dehan, taxa Amerika halo nee halo ba rai sira neebe halo esporta ba Amerika, sira foti taxa temi karik rai ida uluk esporta mobile nee, ezemplu deit US$ 100 agora komu aumenta mobile nee sei karun too US$ 300.
“Neebe laos direitamente ba ita, ita nia problema deit mak dolar sei sae ita kontente, se tun ita mak sei hakaas sintu para bele lalika han, dala ruma ita nia problema bolu ba han hotu-hotu lao ba han, fila fali mai ema neebe han nee ba tiha ona haree deit ba bikan nakonu hela tanba matan boot liu kabun, ho ida nee mak Estadu tomak neebe gasta hela osan povu nia nee labele matan boot liu kabun, hasai haluha hotu tiha estraga deit, hanesan mos tau osan barak buat nee la kualidade halo la hotu, neebe ita kuidadu mak ida nee, osan sae, osan tun,” katak PM, Xanana.
(eme)
