BAUKAU, STLTIMORLESTE.com – Estadus Unidus Amerika (EUA) liu husi Xefe Gabinete Guarda Nasional, Jeneral Steven S. Nordhaus ofisialmente entrega Hangar ba aviaun no armajen asistensia umanitaria no auxilio ba dezastre naturais iha Komponente Aerea FALINTIL-Forsa Defeza Timor-Leste (F-FDTL) Baukau.
Jeneral Steven S. Nordhaus esplika, armajen refere atu utiliza ba asistensia umanitaria no ajuda ba dezastre naturais nian, enkuantu hangar ba aviaun Cessna. Husi serimonia entrega nee marka parseria kritiku entre EUA ho Timor Leste no kompromisu fahe prontidaun, reziliensia no kooperasaun rejional.
“Ida nee onra ida, ohin ita selebra marka ida tan iha parseria krítiku ida entre Estadus Unidus no Timor Leste. Armajen asistensia umanitaria atu ajuda ba dezastre no Hangar ida nee reprezenta edifisiu sira simboliza ami nia kompromisu fahe prontidaun, reziliensia kooperasaun iha rejional,” hatete Jeneral Steven liu husi diskursu iha serimonia entrega neebe realiza iha Aeroportu Lanud, Baukau, Sesta (04/04/2025)
Guarda Nasional husi EUA nee sente orgulhu, tanba bele servisu hamutuk ho Estadu Timor Leste hametin parseria no sai testamentu ida ba forsa programa parseria entre nasaun rua.
Tanba dezde 2020, Guarda Nasional Rhode Island hetan onra hodi kolabora ho Forsa Defeza Timor Leste, harii relasaun sira neebe hakat liu husi ezersisiu, formasaun no troka sira.
“Parseria ida nee haburas ona komprensaun mutua, respeitu no abilidade ida atu hatan ho efisiensia no legalidade ba dezafiu sira neebe ita hasoru hamutuk, dezafiu sira mak real liu iha rejiaun importante ida nee,” Steven akresenta
Visi Xefe Estadu Major Jeneral Calisto dos Santos “Coliati” esplika, Hangar sei utiliza ba uma aviaun Cessna no armajen asistensia umanitaria no auxilio dezastre naturais atu armajena produtu sira apoiu husi internasional, bainhira Timor Leste hasoru dezastre naturais boot.
“Aviaun nia uma no armajen nee oferta husi Estadus Unidus Amerika liu husi koperasaun Militar entre Timor Leste ho Estadus Unidus. Portantu dezenvolvimentu ba ita nia Forsa Aerea nee ita hahu husi baze mak sai mai, ho mudansas sira iha nee hatudu sinal diak mai ita, ita sei dezenvolve Forsa Aerea,” Coliati katak
Visi Xefe Estadu Major sublina, apoiu husi Estadus Unidus Amerika nuudar pasu importante, tanba Forsa Aerea iha Timor Leste hahu dezenvolve mezmu ho fazeadamente no sei servi interese nasional nomos rejional.
Coliati katak, mezmu dezenvolve Aerea sei iha duvida ba konstrusaun Estadu, tanba sei natoon, maibe fazeadamente sei kompleta.
Nunee nia husu Forsa Komponente Aerea Timor Leste atu kuida fasilidade neebe apoiu husi parseiru sira, nunee bele utiliza ba tinan naruk hodi servi interese nasional.
Entretantu partisipa iha seremonia entrega Hangar no armajen partisipa masimu husi membru FALINTIL – Forsa Defeza Timor Leste no EUA nomos membru Polisia husi Komando Polisia Munisipiu Baukau no Prezidente Autoridade Munisipal.
(tom)
