DILI, STLTIMORLESTE.com – Estadus Unidus Amerika (EUA) ho Governu Timor Leste (TL) halao lansamentu ofisial ba Ajensia Estadus Unidus ba Dezenvolvimentu Internasional (USAID) nia atividade ba Sistema Saude Integradu (IHSA), ho objetivu atu hadia ambiente neebe permite servisu saude sira atu sai ekuitativu no sustentavel.
Embaixadora EUA iha Timor Leste, Donna Ann Welton hatete, USAID nia atividade ba sistema integradu ho investimentu hamutuk milhaun US$17, ho objetivu atu hadia ambiente neebe permite servisu saude sira atu sai ekuitativu no sustentavel.
Nia esplika, atividade ba sistema integradu ida nee sei atinji liu hodi dezenvolve no implementa politika asegura finansiamentu saude, neebe adekuadu no previzivel hadiak administrasaun no responsabilizasaun Governu nian no promove advokasia bazeia ba evidensia hodi promove pratika diak sira.
“USAID nia atividade ba Sistema Integradu Saude nee, sei apoia esforsu Governu Timor Leste nian atu garante asesu neebe sustentavel inkluzivu ba sistema saude neebe efisiente, ekuitativu no kuidadu saude ho kualidade aas hodi hatan ba nesesidade povu timoroan nian,” hatete Embaixadora EUA, Donna Ann Welton liu husi nia diskursu iha Otel Timor, Sesta (08/11/2024).
Nia esplika, Estadus Unidus nafatin dedikadu atu apoia Timor Leste nia dezenvolvimentu, partikularmente iha setor saude no setor vital sira sleuk.
“Ami sente orgulhu atu hamriik hamutuk ho povu Timor, hodi harii nasaun ida neebe saudavel,” nia deklara.
Donna Ann Welton hatete, iha tinan tolu oin mai, USAID sei kolabora ho Ministeriu Saude, Institutu Nasional Saude Publika Timor Leste, sei kolabora ho Autoridade Munisipiu sira, organizasaun sosiedade sivil, no asosiasaun profisional saude sira nodi hasae kualidade kuidadu saude primariu neebe Sentradu ba pasiente, planeamentu familiar no saude reprodutiva, saude inan, kosok-oan, bebé foin moris, labarik, no adolesente no programa nutrisaun nian.
Iha fatin hanesan, Visi Ministru ba Operasionalizasaun Ospitál, Flávio Brandão Mendes de Araújo, agradese ba USAID neebe durante suporta Ministeriu Saude atu hametin sistema saude neebe mak integardu alina ho porgrama Governu nian.
Atividade sira nee atu haforsa sistema saude hodi fo rezultadu neebe mak diak, atu nunee saude bele iha kualidade no eleva iha nivel jestaun no atendimentu nian,” nia afirma.
(jen)
