DILI, STLTIMORLESTE.com – Eis Deputadu Cornelio Gama L7 hatete, atu halo rekonsiliasaun nee kompetensia husi Prezidente Republika nomos Primeiru Ministru, nia parte labele koalia buat ida, no Eurico Guteres mos bele partisipa iha selebrasaun loron proklamasaun 28 Novembru nee laiha buat ida, importante mak labele mosu konflitu iha selebrasaun importante nee.
Liafuan nee Eis Deputadu, Cornelio Gama ” L7″ hatete ba jornalista sira iha Palasiu Prezidensial, Tersa (26/11/2024).
Nia hatete, kona-ba Eurico Guteres mos partisipa iha selebrasaun loron proklamasaun ba 28 Novembru nee laiha buat ida, importante mak labele mosu konflitu iha selebrasaun loron importante nee.
“Objetivu rekonsilasaun nee diak, buat ida naksalak nee ita bele halo diak, mais tenke haree akontese ona, ita tenke hadia halo didiak, para labele mosu konflitus. Hau nia hanoin buat diak, mais ita tauk populasaun sira, hanesan Timoroan iha NTT sira mai, depois Timoroan sira iha Timor haree katak, uluk nia mak oho hau nia feen no hau nia alin, maun no familia sira. Nee mak mosu problema ita rezolve oinsa,” katak L7.
Eis Deputadu nee hatete, atu halo rekonsiliasaun entre Timoroan iha Timor nomos ho Timoroan iha Indonezia, nee kompetensia husi Prezidente Republika nomos Primeiru Ministru.
“Tanba rekonsiliasaun nee kompetensia Prezidente Republika, Primeiru Ministru, Parlamentu no Prezidente Tribunal Rekursu mak hanoin no tetu halo diak, ami veteranus patronia nasaun nee ami kontinua apoiu Governu no apoiu nasaun atu labele mosu konflitu,” katak nia.
Iha biban nee nia mos rekomenda ba iha lider nasional sira hotu tenke tetu didiak lai hafoin halo rekonsiliasaun, nunee labele mosu konflitu.
“Hau husu ba ita nia lider sira, primeiru tenke haree justisa, tau didiak lai hafoin halo rekonsiliasaun, atu nunee labele mosu konflitu, ami patrimonia nasaun, ami lakohi nasaun nee atu estraga,” dehan nia.
Nesesidade duni halo rekonsiliasaun, rekonsiliasaun nee tenke halo duni no rekonsiliasaun nee diak liu, maibe presiza nahe biti, tuur hamutuk mak bele halo rekonsiliasaun, la bele hatete deit halo rekonsiliasaun, tanba vitima ba violasaun direitu umanus nee barak.
(eme)
