DILI, STLTIMORLESTE.com – Estudante Universitariu Timor Leste (EUTL) halo manifestasaun uza fatuk hodi tuda ba membru Polisia Nasional Timor Leste (PNTL) neebe fo seguransa iha Parlamentu Nasional (PN) nomos jornalista sira neebe kobertura. Fatuk nee sira tuda mai kona membru PNTL balun no kona mos ba jornalista sira. Komesa husi nee membru PNTL tiru gas air mata.
Tuir observasaun STL iha terenu, Segunda nee (15/09/2025), antes halo manifestasaun estudante sira halo uluk orasaun no kanta hino nasional. Depois kontinua halo manifestasaun hodi hakilar abaixu PD, CNRT, PLP, KHUNTO, Viva Povu Maubere, Viva Timor Leste, la kelur sira komesa uza aqua no la kleur tan iha manifestasaun nee sira uza fatuk hodi tuda tan iha membru PNTL sira neebe fo seguransa iha PN nomos jornalista sira neebe halo kobertura iha fatin refere. Fatuk neebe sira tuda kona membru PNTL balun no kona mos jornalista sira. Komesa husi nee membru PNTL sira mos komesa tiru gas air mata iha fatin neeba.
Bainhira membru PNTL komesa tiru gas air mata halo estudante sira komesa halai sai husi fatin manifestasaun no balun monu iha fatin, tanba kauza husi gas air mata neebe kona sira.
Liu tiha minutu 10 hanesan nee, estudante sira koninua halo fali manifestasaun hasoru deputadu no deputada sira iha PN neebe atu sosa kareta prado.
Entretantu Komandante PNTL Munisípiu Dili, Superintendente Xefe Polísia Orlando Gomes informa ba membru sira atu kontinua fo seguransa metin ba PN no haruka sira tenke halao manifestasaun tuir regras neebe PNTL fo sira.
Jornalista: Jeniche da Costa
Editora: Domingas Gomes
