DILI, STLTIMORLESTE.com – Estudante Universitariu Timor Leste (EUTL) hamutuk ho sosiedade sivil, ema ho defisiensia no povu kiik sira kontinua hakilar hodi dehan abaixo sosa kareta ba deputadu no abaixo pensaun vitalisia.
Iha loron kuarta (17/09/2025) EUTL hamutuk ho sosiedade sivil, ema ho defisiensia nomos povu aileba halo manifestasaun ba loron datolu kontinua hakilar ho lian ida abaixo naok ten, abaixo sosa kareta ba deputadu no abaixo ba pensaun vitalisia, tanba povu sei moris kiak.
Tuir observasaun neebe STL hetan antes halao manifestasaun, parte seguransa liu husi segundu Komandante Polisia Nasional Timor Leste (PNTL), Pedro Belo komunika ho portavos manifestante katak bele halo manifestasaun maibe labele uza violensia no nafatin kontrola malu, tanba terseira parte bele tama estraga, tanba nee husu manifestante kontinua matan moris neon nain bele kritika maibe labele ho asaun violensia, no portavos manifestante mos konkorda.
Antes sira halao manifestasaun kontra deputadu sira hahu halo orasaun, nunee husu Jesus no matebian akompanha sira nia luta, remata kontinua ho hananu Hino Nasional Patria Patria, remata kontinua kedas ho um minutu silensiu hodi fo ondra ba eroi sira neebe sakrifika aan ba rai nee hodi hetan ukun rasik aan.
Portavos UNTL no Kordenador Jeral, Jose da Costa hatete, sira nia manifestasaun nee objetivu rua, ida mak kontra deputadu sira neebe halo lei fo benefisiu ba sira nia aan, sira nia grupu, sira nia familia no sira nia partidu, no objetivu segundu mak okupa espasu ida nee hodi fo asaun politika ba povu ba sosiedade no inan aman sira nunee bele hatene no komprende katak deputadu ka elit politiku sira nee bosok ten hodi lohi povu liu husi sira nia kampanha.
“Ita nia asaun nee iha objetivu rua, ida ikus mak fo edukasaun ba ita nia sosiedade, tanba oras nee iha dominsaun iha elit, uza povu hodi aproveita halo lei tuir sira nia hakarak,” katak nia.
Iha biban nee, objetivu ida halo manifestasaun mak luta hodi kontra sosa kareta no seluk luta halakon pensaun vitalisia, tanba povu sei moris kiak maibe parlamentu halo lei hodi halo riku sira nia aan no halo riku ba sira neebe kaer ukun.
Remata manifestasaun kontinua hakilar haklalak hodi dehan Viva Povu Maubere, no liafuan seluk dehan halo lei habokur aan, Aman Deputadu Naok Osan Povu Nia, Oan Naok Helem, polisia salariu kiik defende naok ten, no hakilar hetok makaas liu tan katak la konkorda Parlamentu Nasional sosa kareta foun ba deputadu iha lejislatura da-6, hamoos ka halakon lei pensaun vitalisia, revoga lei numeru 1/2006 artigu 5 kona-ba distansia 100 metru dook husi instituisaun orgaun soberanu antes halao demostrasaun ka manifestasaun.
Demostrasaun ba loron da tolu hetan partisipasaun no asegura masimu husi seguransa Polisia Nasional Timor leste, maske iha oras tuku 13.30 mosu barulhu oituan tanba balun uza fatuk tuda ba parlamentu no balun tuda akua hodi hamanas situasaun maibe iha portavos estudante hamutuk ho PNTL koko hakalma fali situasaun.
Jornalista: Emerenciana Pinto
Editor: Xisto Mendonça
