DILI, STLTIMORLESTE.com – Estudante Universitariu Timor Leste (EUTL) hamutuk ho Sosiedade Sivil, ema ho defisiensia, grupu LGBT no povu kiik sira durante loron 3 kontinua hakilar hodi dehan abaixo sosa kareta ba deputadu no abaixo pensaun vitalisia, husi sira nia luta marka istoria.
Tuir observasaun neebe STL iha terenu nota katak, durante loron 3 estudante sira hakilar, haklalak hodi dehan viva, maske mosu konfrontu oituan ikus polisia tiru gas air mata maibe sira la hakiduk no kontinua luta hodi hakilar husu deputadu Parlamentu Nasional kansela sosa prado, halakon lei pensaun mensal vitalísia no lei manifestasaun 100 metru.
Husi sira nia luta marka istoria ba povu nasaun nee, tanba deputadu sira ho votus unaminidade kansela sosa kareta, no akordu husi bandaka 5 atu hapara pensaun vitalisia neebe sei debate jeneralidade iha loron 25 semana oin ba pensaun vitalísia no altera lei 100 metru manifestasaun.
Akordu neebe EUTL asina hamutuk husi bankada CNRT, PD, PLP, FRETILIN no KHUNTO iha uma fukun Parlamentu Nasional sai baze forte ba manifestante sira hodi debate semana oin.
Iha intervista Portavos UNTL no Kordenador Jeral, Jose da Costa hatete, sira nia manifestasaun nee objetivu rua ida mak kontra deputadu sira neebe halo lei fo benefisiu ba sira nia aan, sira nia grupu sira nia familia no sira nia partidu, no objetivu segundu mak okupa espasu ida nee hodi fo asaun politika ba povu, ba sosiedade no inan aman sira, nunee bele hatene no komprende katak deputadu ka elit politiko sira nee bosok ten hodi lohi povu liu husi sira nia kampanha.
“Ita nia asaun nee iha objetivu rua ida ikus mak fo edukasaun ba ita nia sosiedade, tanba oras nee iha dominsaun iha elit, uza povu hodi aproveita hodi halo tuir sira nia hakarak,” katak nia.
Nia hatete, objetivu ida halo manifestasaun mak luta hodi kontra sosa kareta no seluk luta halakon pensaun vitalisia, tanba povu sei moris kiak, maibe parlamentu halo lei hodi halo riku ba aan no halo riku ba sira neebe kaer ukun.
Jornalista: Emerenciana Pinto / Alberto Menezes
Editora: Domingas Gomes
