BAUKAU, STLTIMORLESTE.com – Sidadaun Eva Fernandes idade 56 hakotu iis hafoin sai husi uma ba hariis iha bee dalan Kumololi entre Suku Kaibada no Tirilolo, Postu Administrativu Baukau Vila, Munisipiu Baukau.
Familia matebian Sebastião da Costa Fernandes haktuir, iha loron 29 Maiu 2025, pur volta tuku 02:30 meudia, matebian sai husi rezidensia Buidudu ho intensaun ba haris iha bee dalan Kumololi, maibe too iha tuku 04:40 parte familia simu novidades triste husi pesoal primeiru neebe hetan vitima nia isin loron iha bee dalan, tanba vitima laiha ona iis.
Nunee parte familia too kedas fatin hodi evakua matebian nia isin mate no asegura iha rezidensia hein parte seguransa Polisia too kedas fatin rekolha dadus no investigasaun, maibe parte familia la aseita submete ba prosesu autopsia, tanba deskonfia vitima mate rasik neebe kauza husi moras komplikadu balun.
“Nia ba haris mak monu tama bee laran, bee lori too metru 100 resin mak belit iha fatuk taka netik tiha bee, nee mak sira mai atu hamos bee dalan nee mak hetan, maibe hasai mai mate tiha ona, nia nee moras monu hela deit, lalika autopsi tanba ami la deskonfia buat ida,” hateten Sebastião da Costa Fernandes ba jornalista sira iha rezidensia Buidudu, Sesta (30/05/2025).
Pesoal primeiru neebe hetan vitima nia isin mate, Paul da Costa hateten, tempu loraik nia parte atu hamoos bee dalan, tanba bee dalan refere intupidu, nunee too fatin atu hamoos, maibe derrepente haree vitima nia ain deit no isin lolon seluk bee sulan tama ba fatuk okos.
“Hau hanoin bee tersumbat, neebe hau atu hamoos nee mak hau haree nia ain, maibe hau hanoin nee ai, nee mak hau dada sai mak ema, nee mak hau bolu sira ami hasai,” Paul konta.
Enkuantu tuir informasaun neebe STL asesu iha terenu nota katak, hafoin akontese parte Polisia Munisipiu Baukau too kedas fatin halo koordenasaun ho parte familia atu submete ba prosesu autopsia, maibe familia la konkorda, tanba matebian hetan moras bibi maten neebe deskonfia moras refere mak hamate matebian iha bee laran.
Dezisaun familia nee parte Polisia aseita no daudaun matebian nia isin mate rai iha rezidensia Buidudu hodi haloot tuir kultura Timor nian.
(tom)
