DILI, STLTIMORLESTE.com – Tribunal Judisial Primeira Instansia Dili liu husi leitura akordaun ba krimi violasaun ho nia agravasaun, deside absolve arguidu ho inisial SM, tanba konsidera la provadu ba iha krimi neebe halo hasoru lezada AS.
Iha sala julgamentu laran, Juiz prosesu Zulmira Auxiadora deklara katak, iha inisiu arguidu nega ba faktus, katak arguidu la halo aktu nee.
Tribunal deklara, depois Tribunal konfirma ba lezada no lezada deklara katak momentu neeba arguidu ho lezada hakarak no hakarak.
Juiz deklara, krimi neebe Ministeriu Publiku akuza ba arguidu, iha krimi nee dehan obriga no ameasa mak halo aktu nee. Maibe Tribunal haree la akontese ameasa no obriga, tanba nee Tribunal husu atu absolve arguidu husi instansia.
Tuir akuzasaun neebe iha katak, arguidu SM ho lezada AS sei relasaun familia.
Momentu neeba lezada no arguidu halo relasaun seksual, no aktu nee arguidu halo beibeik. Maibe lezada la fo hatene ba nia familia, tanba arguidu ameasa lezada kuandu lezada koalia sai.
Maibe ikus mai lezada gravida, tanba nee mak lezada nia inan aman bolu lezada hodi husu, no lezada foin koalia sai.
Konsekuensia husi arguidu nia hahalok nee, lezada lakon nian virjinidade, sente tauk no la seguru.
Arguidu SM komete krimi ho voluntaria, livre, deliberada no konsientemente, arguidu hakarak satisfazer nian dejezu seksual ba lezada, maske arguidu hatene katak lezada sei ho idade kiik, maibe arguidu kontinua ho nia aktu hodi prejudika lezada nian eskola no mos fo responsabilidade todan ida hodi hahoris oan iha tempu neebe seidauk prontu sai inan, nunee arguidu nian hahalok kontra lei.
Arguidu SM hanesan autoria material ba krimi aktu seksual ho agravasaun neebe previstu tuir artigu 1720 ho 173.
Audensia julgamentu nee prezide husi Juiz Koletivu Arjentino Nunes, Zulmira Auxialdora no Ivan Patrocenio, Ministeriu Publiku reprezenta husi Prokurador Renato Bere Nahac, arguidu hetan asistensia legal husi Advogadu Privadu.
(ter)
