DILI, STLTIMORLESTE.com – Eviksaun forsada neebe Sekretariu Estadu Asuntu Toponimia Organizasaun Urbana (SEATOU) implementa mak sai alternativu ba governu nia programa duke haree povu nia moris, tanba duni povu kiik sira husi sidade ho razaun dezenvolvimentu no ordenamentu sidade nian.
Haree ba eviksaun iha Dili laran no mos iha fatin ba fatin povu tanis halerik tanba lakon sira nia hela fatin. Maibe governu duni nafatin sira husik deit ema neebe iha kapital no forsa politika mak moris no goza mesak iha sidade Dili.
“Ita haree eviksaun iha Komoro tun ba too tasi ibun lori eskapator suru tetuk halo povu tanis no halerik, maibe governu dehan ba hela iha foho,” dehan Visi Prezidente Partidu Libertasaun Popular (PLP) ba asuntu Orgaun Asosiadu no Movimentu Nasional, Amilcar Araujo dos Reis Hatenu ba STL, iha nia hela fatin Manleuana, Dili, Kuarta (07/05/2025).
Iha momentu neeba Amilcar dehan, udan iha loron 1 fulan janeiru 2025 no iha loron 3 eskapator tama suru halo tetuk hotu, ikus mai governu dehan ida nee atu halo jardim maibe realidade halo fali penahan tanba penahan osan boo jardim osan kiik.
Nunee mos eviksaun iha Bekora primeiru ba sukat ho 3 metrus ikus ba dehan loke tan 2 ka 3 metrus tan fila governu go povu trata malu, Primeiru Ministru, Kay Rala Xanana Gusmao sadik dehan lori ba Tribunal.
“Ita duvidas tanba sa mak Primeiru Ministru ho Sekretariu Estadu Asuntu Toponimia Organizasaun Urbana sadik povu lori ba Tribunal,”dehan nia.
Nia relembra hateke fali ba ponte sorin EDS nian tinta mean kona hotu, maibe governu liu husi SEATOU la halo eviksaun serake SEATOU haree ida nee la fo vantajen tanba la iha planu.
“Estrada atu loke sae ba ida nee labele halo eviksaun, halo uluk lai ida nee bele hetan tender boot, povu bele hela ponte okos mos duni nafatin, hodi nunee projetu nee bele aselera lalais para hetan lukru,” hatete Amilcar.
Entretantu Sekretariu Estadu Asuntu Toponimia Organizasaun Urbana (SEATOU), Germano Santa Brites Dias ho ekipa inter-ministerial halao eviksaun iha area Komoro hafoin uma kain 20 iha loron 1 fulan Janeiru 2015 hetan sobu husi mota boot, no iha loron 2 fulan Janeiru tinan 2015 uma 8 hetan tan estraga husi mota.
Eviksaun neebe Sekretariu Estadu Asuntu Toponimia Organizasaun Urbana (SEATOU) halao nee halao nee hahu iha loron 2 fulan Janeiru 2025, no prepara mos transporte hodi ajuda lori populasaun sira ba idak idak nia Munisipiu.
(car)
