DILI, STLTIMORLESTE.com – Xefe Departamentu Kordenasaun Jestaun Risku no Formasaun Edukasaun Sivika Diresaun Nasioná Seguransa Rodavizaria Polísia Nasional Timor Leste (PNTL), Superintendente Assistente Polísia Domingos Sarmento Gama hateten, atu evita membru PNTL labele komete krimi subornu iha terenu bainhira tilan kareta ka motór, ho nunee Governu tenke estabelese sistema elektronika.
“Hau hakarak hateten, ohin ita nia estudante preokupa kona-ba servisu membru PNTL nian iha terenu, liu-liu kona-ba tilan sira nia motór dala rua membru husu fali osan. Atu evita husu subornu iha terenu, dalan uniku ba Governu ida nee ou estadu ida nee tenke estabelese ona Eletonic Tilan Law Enforceman (ETLA),” hatete Domingos Sarmento Gama ba jornalista sira iha Komando Jeral PNTL Kaikoli, Tersa (02/09/2025).
Nia esplika, dala barak sempre preokupa membru polísia tranzitu sira nia servisu, tanba dala barak sira halo pasa revista no halo tilan ba transporte sira sempre husu osan, tanba nee presiza estabelese sistema ETLA, nunee bele evita aktu sira hanesan nee.
Nia informa, iha Indonezia introdus ona sistema hanesan kamera halo tilan ba ema nia motór ka kareta kuandu sira vioala lei kodigu Estrada. Kuandu sistema nee deteta atu se deit tenke ba selu obrigatoriamente iha banku laiha nego, entaun Dili nee tenke aplika ona.
Nia husu ba sidadaun sira, karik hetan membru PNTL halo servisu la profisionál, liuliu ba konstrui transporte sira nunee halo tilan ba transporte sira mak husu fali osan ba motorista sira nee krime, no bele hatoo ba Komandu Jerál PNTL hodi halo prosesu.
“Se sira rasik sente vitima duni ba krime korupasaun nee sira tenke keixa hasoru suspeitu sira neebe koko uza nia poder hodi husu buat ruma ba sidadaun sira,” nia deklara.
Domingos husu ba membru polísia sira tenke hatudu servisu neebe profisionál.
Iha fatin ketak Motorista Jose Pinto informa, membru PNTL balun halo hela check point, sira simu mos osan husi motorista sira.
“Hau nia maun uluk Polísia tilan nia kareta, tanba SIM laiha fo deit US$ 50 los ona, sira fo fila ona dokumentus,” nia tenik.
Nia hatutan, tanba nee ho sistema neebe Governu kria nee, elektronika tilan mak hatene rasik deit.
Jornalista: Jeniche da Costa
Editora: Domingas Gomes
