DILI, STLTIMORLESTE.com – Evita problema entre estudantes husi Eskola Sekundariu Jeral Nobel da Paz no 4 Setembru Balide atu labele hein malu iha dalan, Fundador no Diretor husi eskola rua nee sei konvida malu hodi halo diskusaun.
Liafuan nee haktuir husi Fundador Eskola Nobel da Paz, Jeremias P. de Jesus ba STL, Segunda (11/08/2025).
“Iha loron 5 fulan Julhu liu ba, ita nian Visi Primeiru Ministru mai vizita ami nian eskola, oinsa mak estudantes husi eskola rua hanesan Nobel no 4 de Setembru labele hein malu iha dalan, hodi halo problema. Tanba nee hau sei konvida Diretor Eskola 4 de Setembru Balide mai iha nee para hodi koalia, oinsa mak ami nian estudantes sira halo problema, liu-liu iha tempu ezame ninia, sempre hasoru malu baku malu no tuda malu, ida nee la diak. Tanba ami profesor nee haree malu diak, maibe estudantes sira mak sempre hafuhu malu, buat hirak nee la diak no tenke evita,” nia dehan.
Nia hatete, husu mos ba inan aman sira atu fo hanoin nafatin oan sira. Bainhira mai iha eskola tenke hadok aan husi konflitu, tanba objetivu ba eskola nee atu tuir aprendizajen too oras too fila ba uma no labele halo problema iha eskola no fatin neebe deit.
Nia dehan, kuandu baku iha eskola, nee husi eskola sei haree no fo apoiu seguransa, hodi bele kria establidade iha areador eskola nian, no bolu inan aman mai para bele rezolve buat hotu sei lao ho diak, maibe liu ona husi ida nee hanesan 50 metru, nee inan aman no polisia mak hatene.
Iha parte seluk Diretur Eskola Sekundariu Jeral no 4 de Setembru Balide, Sergio A.da Cruz hatete, nee hanesan dalan diak ida ba estudantes sira, atu oinsa estudantes husi eskola rua nee labele halo problema ou hein malu iha dalan.
(jac)
