DILI, STLTIMORLESTE.com – Tuir Edukasaun Munisipiu Dili ninia monitorizasaun ba ezame nasional iha eskola sira Munisipiu Dili lao ho diak, meza no kadeira mos sufisiente ba estudantes sira.
Haktuir Superintendente Edukasaun Munisipiu Dili, Cesarina Correia Guterres ba STL, Kuarta (22/10/2025).
“Ami nia atividade ezame nasional nia monitorizasaun loron daruak hamutuk 23 eskola mak hanesan, EBC 15 eskolas, ESG 7, ESTV 1. Atividade ezame lao diak no normal. Provizoriomente atividade ezame nasional nee lao diak. Kona ba fasilidade meja no kadeira iha eskola sira sufisiente ba ita nian estudantes sira, hodi bele uza ba iha atividades ezame nasional neebe tuir kalendariu halao ona iha loron 20 fulan nee,” nia dehan.
Nia katak, hahu husi ezame nasional loron primeiru too Tersa sira nafatin halo monitorin ezame ba eskola sira iha MunisÃpiu Dili, nee duni depois de ezame nasional estudantes sira sei kontinua fali ba ezame lokal.
Iha fatin seluk, Diretor Eskola Hotelaria no Turizmu Bekora, Charles F. Guterres hatete, hahu husi ezame loron primeiru too agora lao diak hanesan bai-bain, fasilidade sufisiente ba estudantes sira, no estudantes husi eskola ida nee partisipa hotu iha ezame nasional.
“Iha ami nian eskola laiha problema no ami nian estudantes partisipa masimu hotu iha ezame nasional, nee duni ezame ida nee lao diak hanesan baibain, ami laiha difikuldade ruma, tanba buat hotu lao ho diak,” tenik nia.
Nia dehan, total estudantes neebe partisipa iha ezame nasional hamutuk 64, husi numeru nee kompostu husi Departamentu Hotelaria 26, Departamentu Culinaria 18, Departamentu Costura 15, Departamentu Beleza 5.
Jornalista: Jacinta Sequeira
Editora: Domingas Gomes
