DILI, STLTIMORLESTE.com – Ezame Nasional ba estudantes finalista sira husi nivel ensinu baziku, sekundariu no ensinu tekniku vokasional sei halao iha loron 20 Outubru tinan nee.
Haktuir Sekretariu Estadu Ensinu Sekundáriu Jeral no Ensinu Sekundáriu Tekniku Vokasional, Domingos Lopes Lemos ba jornalista iha salaun Ian Martin Balide, Segunda (29/09/2025).
Nia dehan, Ezame Nasional nee sei halao iha loron 20 Outubru tinan nee, tanba nee mak prezensa profesor sira agora nee apoiu tomak. Karik sira ba iha ensinu baziku no apoiu tan iha terseiru siklu ba nono ano ba ezame nasional ninia.
“Mensajen ba profesor sira mak atu hanorin ho diak, no estudantes sira neebe mak finalista nee atu estuda makas, nunee bele pasa ho valor neebe diak. Ezame nasional nee lao diak iha prosesu inisiu nee, prosesu normal iha eskola sira lao hanesan bai-bain,”nia esplika.
Nunee mos Kordenador Gabinete Unidade Kurikulum Nasional iha ME, Joao Maupelu hatete, bainhira imprimi hotu sei ba halo verifikasaun, mak sei koloka tuir disiplina eskola ida-idak. Depois dia 1 hanesan nee halo ona pakotementu, dia 17 Outubru nee distribui ona pontus ezame nasional. Total finalista neebe sei partisipa iha ezame nasional tinan nee hamutuk 55.902.
Iha fatin seluk Diretor Edukasaun Munisipiu Likisa, Julio da Silva dehan, eskola idak-idak nian preparasaun ba ezame nasional nee lao hotu ona, hein deit orientasaun ba kalendariu neebe mak iha, hodi bele realiza ezame nasional ba tinan ida nee.
Jornalista: Jacinta Sequeira
Editora: Domingas Gomes
