BAUKAU, STLTIMORLESTE.com – Too loron 02 Dezembru nee, ezekuzaun Orsamentu Jeral Estadu (OJE) 2024 iha Autoridade Munisipiu Baukau atinji ona 82.6%.
Informasaun nee hatoo husi Sekretariu Munisipal Asuntu Administrasaun no Finansas, Juvinal Daniel Filipe Belo ba STL iha Vila Nova, Segunda (02/12/2024).
“Ezekuzaun Autoridade Munisipiu Baukau tinan 2024 husi kategoria 5, salariu vensimentu, bens servisu, kapital minor, transferensia no kapital dezenvolvimentu, husi alokasaun US$ 9.456.741,00, nia ezekusoens US$ 7.811.114,00,” nia relata.
Ezekuzaun OJE 2024 tuir nia liu husi kada Diresaun Servisu Munisipal Finansas 86%, Saude 84%, Edukasaun 78%, Agrikultura 76%, Obras Publiku 83%, Agua Saneamentu 71%, Jestaun Merkadu 66%, Rejistu Notariadu 72%, Protesaun Sivil 55%, Servisu Alimentar 80%, Postu Administrativu 6 77%, Asaun Sosial 87%.
“Nia lao ona too 82.6% diak, sei la sae tan, tanba iha kapital dezenvolvimentu kapital minor neebe ita sei halo pagamentu iha fulan nee nia laran,” Daniel akresenta.
Sekretariu Munisipal Asuntu Administrasaun no Finansas nee argumenta, Autoridade Munisipiu Baukau iha esperansa ba OJE 2025 sei lao diak liu tan tuir regras no prosedimentu neebe iha.
OJE 2025 Autoridade Munisipiu Baukau propoin hamutuk US$ 12 milhões resin neebe sei aloka ba programa 19 hodi implementa atividade 65 iha servisu Munisipal.
(EST 2)
