DILI, STLTIMORLESTE.com – Prezidente Tribunal Rekursu (PTR), Deolindo Dos Santos hatete, Ezekusaun orsamentu husi Tribunal sira nian atinji ona 50% ital, no espera tinan nee remata bele atinji ezekuasaun neebe boot.
“Ezekusaun orsamentu agora daudaun nee iha 50% ital, pelu menus fim do ano ka tinan nee remata sei atinji ezekusaun neebe boot,” dehan PTR, Deolindo ba jornalista sira iha Kaikoli, Dili, Kuarta (06/11/2024).
Nia hatutan, nia problema mak iha obra balu neebe laos Tribunal mak deside, maibe envolve mos Instituisaun sira seluk. Ezemplu sira iha orsamentu ba dezenhu ba Tribunal sira, maibe agora hein hela faze final atu halo pagamentu, maibe presiza mos verifikasaun sira neebe mai husi Instituisaun sira neebe envolve, Ajendia Dezenvolvimentus Nasional (ADN), Obras Publiku, bainhira sia verifika hotu ona, selu ona.
Maibe obra kiik sira neebe iha ho sira nee hotu ezekusaun sei boot. No saida mak sei la ezekuta, esplika ona iha Parlamentu Nasional ba tinan ida nee nian mak iha orsamentu rua, ida mak iha Kapital Dezenvolvimentu iha Oekusi nian labele ezekuta, tanba loke konkursu tenke kumpri regra neebe iha, no loke ona konkursu dala tolu la iha Empreza ida mak prienxe kriteira, tanba nee tuir lei labele halo, tanba la prienxe kriteira husu PN atu tau fali osan ba tinan oin.
Ida mak kona-ba salariu vensimentu, iha orsamentu previzaun ba tinan ida nee nian iha parte rua mak iha ida ba Juiz estajiadu sira neebe tuir loos tama ba iha Tribunal iha fulan Julhu liu ba, maibe agora Governu nia desizaun seluk sira la mai, orsamentu ba sira la selu iha neeba nafatin. No parte ida mak iha Juiz nain 2 neebe sai husi kareira hanesan Juiz, no komesa sira sai la selu ona, orsamentu neebe iha la sai, afeta mos ba ezekusan orsamentu nian, maibe restu ezekusaun lao hela.
Hatan kona-ba orsamentu ba tinan oin, PTR dehan sira kumpri pakote orsamentu neebe distribui, no iha buat balu neebe husu ba iha Komisaun A atu halo pedidu adisional ruma iha neeba, no orsamentu nee sei la dook husi orsamentu tinan ida nee nian.
No prioridade ba orsamentu 2025 ba formasaun Juiz sira, hari tan Tribunal iha Ermera, Viqueque no Maliana, no mos preve mos atu hari iha Baukau, tanba la iha kondisaun ona, no dezenhu iha ona no orsamentu husu ona ba Governu atu prevee depois mak sei ezekuta kuandu Parlamentu aprova.
Iha fatin ketak, Jurista Jose Maria Guterres dehan, orsamentu 2025 nian tenke prevee atu estabelese tan Tribunal iha Munisipiu sira.
“Hanoin importante tebes atu estabelese tan Tribunal iha Munisipiu sira, atu lori Justisa hakbesik ba komunidade sira,” dehan nia.
(ter)
