BAUKAU, STLTIMORLESTE.com – Ezekusaun orsamentu ba programa merenda eskolar anu letivu 2025, iha Munisipiu Baukau atinji ona 28%.
Informasaun nee relata husi Xefe Departamentu Parke Eskolar iha Servisu Edukasaun Munisipiu Baukau, Sabino Arlindo Ximenes ba jornalista STL iha knaar fatin, Sesta (02/05/2025)
“Foin daudaun ita aprezenta ba munisipiu iha ona 28% ba primeira faze 35 dias efetivus ho total orsamentu hamutuk US$ 481,131.00, segundu faze nee halo ona levantamentu” Sabino informa.
Nia sublina, implementasaun programa merenda eskolar ba loron efetivu 35 iha primeiru periodu hahu iha loron 03 Fevereiru no termina iha loron 25 Marsu 2025, neebe faze dahuluk ezekuta ona orsamentu hamutuk US$ 481,131.00 ba estudante hamutuk nian 32.730 neebe asesu ba programa merenda eskolar.
Nia fundamenta, implementasaun programa merenda eskolar ba faze segundu nian, ekipa halo ona levantamentu no tuir planu sei implementa hikas iha loron 02 Maiu 2025 ho loron efetivu 40.
“Ba segundu periodu nee ita hasae ba 40 dias ho nia orsamentu iha US$ 554,282.40 ba estudante 32.993,” Sabino Arlindo Ximenes akresenta.
Xefe Departamentu Parke Eskolar nee deklara, implementasaun programa merenda eskolar ba faze segundu iha Munisipiu Baukau numeru estudante benefisiariu aumenta, tanba iha faze primeiru nain 32.730, maibe faze segundu numeru estudante benefisiariu sae ba 32.993.
Nia informa, numeru estudante benefisiariu ba merenda eskolar aumenta ba 32.993, tanba hetan estudante transferensia husi munisipiu seluk hamutuk 263, maibe implementasaun la fo impaktu, tanba estimasaun orsamentu ba anu letivu 2025 aprova ba estudante rihun 34.
Entretantu merenda eskolar ba anu letivu 2025 iha Baukau, Governu aloka orsamentu hamutuk US$ 261.990.00 hodi benefisia ba estudante sira iha eskola 200 resin, kompostu eskola pre-eskolar, ensinu baziku privadu no publiku, neebe kada loron estudante nain ida sei han osan 42 sentavus no tuir menu implementa iha programa merenda eskolar 2025 nee, 75% ho produtu lokal, husi produtu sira hanesan Ai-han fo Protesaun, Haburas no Ai-han Haforsa nian.
(tom)
