BAUKAU, STLTIMORLESTE.com – Ezekusaun orsamentu ba Programa Merenda Eskolar iha Munisipiu Baukau too segundu faze nee atinji ona 52%.
Xefe Departamentu Parke Eskolar iha Servisu Munisipal Edukasaun Baukau, Sabino Arlindo Ximenes esplika, implementasaun Programa Merenda Eskolar iha tinan 2025 ba loron efetivu 150, maibe Servisu Munisipal Edukasaun Baukau liu husi Ekipa Jestaun Programa Merenda Eskolar ezekuta ona loron efetivu 75 kompostu faze primeiru no faze segundu termina iha fulan Junhu tinan nee.
“Segundu faze nee ita atinji ona 52%, tanba ita hela deit ona 75 dias ba terseiru no quartu periodu, agora 35 dias pedidu ba ona Autoridade nia fatin aprova ona, agora finansas prosesu ona osan ba konta bankaria EJP,” hateten Sabino ba jornalista sira iha Vila Nova Baukau, Sesta (04/07/2025).
Nia sublina, implementasaun Programa Merenda Eskolar iha Baukau daudaun pauza, tanba loron efetivu 40 ba faze segundu termina ona no daudaun parte finansas husi Autoridade Munisipiu Baukau prosesu ona orsamentu faze terseiru nian ba konta bankaria Ekipa Jestaun Programa sira no tuir planu sei kontinua hikas fornese merenda ba estudante benefisiariu sira.
Faze terseiru sei implementa ba loron efetivu 35 no faze quartu ho loron efetivu 40, nunee bainhira termina sei atinji 100% ba implementasaun Programa Merenda Eskolar iha Baukau.
“Neebe ita nia esperansa ami konfirma nafatin dia 07 ou dia 08 osan bele tama ona iha EJP nia lima bele hahu fali ona merenda terseira faze,” Sabino akresenta.
Entretantu implementasaun Programa Merenda Eskolar ba anu letivu 2025 iha Baukau ho aloka orsamentu hamutuk US$ 261. 990.00 ba estudante benefisiariu husi Pre-eskolar, Ensinu Baziku kompostu privadu no publiku ho total estudante hamutuk 32.730 neebe kada estudante hetan 0.42 sentavus ba loron efetivu 150.
(tom)
