DILI, STLTIMORLESTE.com – Ensinu Baziku Sentral (EBC – sigla português) Manleuana ezekuta konsesaun eskolar tuir planu eskola nian, neebe hatama ona ba Edukasaun Munisipiu.
“Tinan ida nee EBC Manleuana hamutuk ho ninia filial sira foti ona osan konsesaun hamutuk US$ 19.674, neebe ninia ezekusaun ba konsesaun ida nee ba fulan tolu nian, Janeiru, Fevereiru no Marsu, neebe atu dehan deit katak ezekusaun ba konsesaun eskolar hotu ona, agora ami prepara hela relatoriu atu submete ba iha Edukasaun Munisipiu Dili,” haktuir Xefe Gabinete Apoiu Tekniku iha EBC Manleuana, Amelia Florindo Reis ba jornalista STL, Kuarta nee (16/07/2025).
Luisa dehan, osan ida nee ezekuta tuir nesesidade eskola nian, nee mak hanesan ba iha material do alunu ba professor sira, saneamentu, nee duni ba ezekusaun nee eskola jere tuir planu neebe hatama tiha ona ba iha edukasaun. Konsesaun nee kada estudantes hetan US$ 2, maibe eskola hetan uluk mak fulan tolu ninia.
“Ami hetan uluk mak fulan tolu nian, no ezekusaun remata ona, oinsa ami bele prepara fali ami nian relatoriu ba Ministériu liu husi Edukasaun Munisipiu Dili, tanba bainhira ezekuta hotu ona ami tenke submete relatoriu,” nia esplika.
Iha fatin seluk, Diretor EBC 10 Dezembru Komoro, Calistro A. Guterres hatete, relatoriu sei halo notifikasaun ba nota sira, segundu sei halo hela livru kontabilidade, bainhira livru kontabilidade hotu, depois sei hein fila fali relatoriu jeral kontabilidade husi eskola filial tolu no enkamina iha sentru 10 Dezembru atu halo livru kontabilidade jeral ida deit, bainhira remata bele submete ona relatoriu konsesaun nee ba Edukasaun Munisipiu Dili.
“Kona-ba orsamentu fulan tolu nian, hahu husi fulan Janeiru, Fevereiru no Marsu, ami bele hatete katak 100% ami ezekuta hotu ona tuir nesesidade ami nian eskola, tanba tenke aselera mos prosesu relatoriu, entaun bainhira prosesu relatoriu nee enkamina ona ba iha finansas Edukasaun Munisipiu Dili, entaun ami bele halo fila fali planu asaun ba primeiru no segundu periodu,” nia dehan.
(jac)
