MANATUTO, STLTIMORLESTE.com – Ekipa Investigador Unidade Informasaun Seguransa (UIS) Komisaun Anti Korrupsaun (KAK) servisu hamutuk ho Diresaun Investigasaun Kriminal–Commando Operação (DIC-CO) Polisia Nasional Timor Leste (PNTL) ezekuta mandadu Tribunal ba halao buska iha domisiliu no prende sasan dokumentus nian, ba Diretor Programa Nasional Dezenvolvimentu Suku (PNDS) Manatuto.
No konstitui ona nuudar suspeitu ho inisial ES iha ninian servisu fatin edifisiu Administrasaun Munisipal Aiteas Manatuto.
Bazeia ba mandadu Juiza de Direito, Albertina da Conceição das Neves, haknaar aan iha Tribunal Judicial de Primeira Instancia de Baucau, haruka no fo autorizasaun ba KAK nuudar orgaun polisia kriminal espesializada ba asuntu korupsaun halo buska iha domisiliu ho posibilidade ba prende sasan neebe mak iha ligasaun ho faktus hirak neebe investiga ona.
Bainhira too iha suspeitu ES nian servisu fatin, Xefe Ekipa Euclides Madeira akompanha husi Komandante Super intendente DIC-CO PNTL, Manuel Barreto entrega no esplika konteudu karta mandadu orijinal ba suspeitu hodi lee no ekipa esplika ninian direitu no dever sira durante ezekusaun mandadu.
Xefe Ekipa investigador KAK, Euclides Madeira entrega kopia despacho Mandadu asina husi Juiza de Direito, Albertina da Conceição das Neves iha Tribunal Judicial de Primeira Instancia de Baucau nian, no husu atu obrigatoriu koopera ho ekipa KAK ho DIC-CO PNTL hodi imediata ezekuta mandadu ba buska iha domisiliu no prende sasan dokumentus.
Iha aksaun polisiál ezekusaun ordem juiza Tribuna Primeira Instansia Baucau nian nee, suspeitu ES nuudar Diretor PNDS Manatuto nian ho ninian staf no asesor sira kolabora diak tebes ho ekipa KAK ho DIC-CO PNTL nian.
Buska no aprensaun halao iha fatin tolu, iha diretor ninian servisu fatin edifisiu Administrasaun Munisipal Manatuto iha Aiteas, iha kareta privadu laran no iha rezidensia Suku Ailili Manatuto Vila.
Hafoin halao buska iha fatin tolu nee, ekipa KAK ho DIC-CO PNTL lori kedas suspeitu ES hamutuk ho ninian kareta privadu mai iha edifisiu CAC Farol Dili hodi tuir prosesu investigasaun, tuir mandadu nee previstu tuir dispozisaun iha artigo 37 no 2, husi KRTL, iha artigo 226 no 1 al. C), artigo 168, no 1, artigo 170, hotu-hotu husi K.P.P ba suspeitu ninian hela fatin.
Ordem ba halo buska nee konsede iha auto inkeritu nian NUC. 0005/25.CACTL hosi neebe investiga dadaun hela suspeitu kona-ba autoria krimi , p.p husi artigu Kodegu Penal nian.
Ba kumprimentu efetivu ba mandadu ida nee, iha autorizasaun ba asesu iha dependensia hotu-hotu, inklui kofre, fatin hirak rai sasan nian, veikulu hirak nebe uza husi suspeitu no bele fera odamatan, hakat sae husi moru no neutraliza animal sira, se presiza duni, ho observansia ba dispozisaun iha artigu 169 no 170 husi KPP.
Buska nee tenke realiza entre 06.00 oras no 20.00 oras.
Sei tenke elabora autu ida kona-ba buska no prende sasan nian, tuir termu husi artigo 87 no 88 KKP nian. Prazu ba buska prende ne’e ninian durasaun 30 nian laran.
(ter)
