DILI, STLTIMORLESTE.com – Eis Xefe Estadu Maiór Jenerál Forsa Armada (XEMGF), Tenente Jenerál Reformadu Lere Anan Timur hatete, ezistensia FALINTIL ba dala 50, parabens ba povu Timor Leste (TL), tanba sira mak eroi, sira mak hun, sira mak Forsa Armadas Libertasaun Nasional Timor Leste ba FALINTIL.
“Hau nia parabens ba povu Timor Leste, tanba povu laiha ami mos la eziste,” hatete Eis Xefe Estadu Maiór Jenerál Forsa Armada (XEMGF), Tenente Jenerál Reformadu Lere Anan Timur ba jornalista sira iha Tasi-Tolu, wainhira komemora loron FALINTIL ba dala 50, Kuarta nee (20/08/2025).
“Ita hotu-hotu hatene katak FRETILIN mak hamoris FALINTIL, ita temi FRETILIN ita temi mos FALINTIL, sei ita temi FALINTIL, ita la temi FRETILIN, nee ita nega istória,” nia deklara.
Nia esplika, agradese ba Komite Sentrál FRETILIN neebe ho lider sira nee matenek, barak mate ona barak sei moris no sira bele harii Forsa Armadas Libertasaun Nasionál TL sai liman kroat povu maubere nian.
“Ohin 50 anos lo-loos rezisténsia FALINTIL ninia, FALINTIL hahu iha Aileu Aiseremu, FALINTIL 50 anos loke pájina rua, primeira pájina mai 1975 too mai 1999 neebe loke iha Aileu Aiseremu, no primeira pájina FALINTIL hasoru funu ho Indonézia tinan 24,” nia deklara.
Iha fatin ketak, Diretór Ezekutivu Fundasaun Mahein (FM), Nelson Belo kongratula komemorsaun loron FALINTIL ba dala 50, FALINTIL nuudar simbolu rezisténsia iha tepu okupasaun Indonézia iha tinan 24, parabens ba komemorasaun aniversariu loron FALINTIL ba dala 50.
“FALINTIL nee nuudar simbolu rezistensia ida neebe mak iha momentu neeba hasoru okupasaun Indonésia, entaun FALINTIL hatudu ninia rezistensia, bainhira kuandu Timor Leste ukun rasik aan, halo restaurasaun FALINTIL kontinua sai inspirasaun ba forsa regular ne’ebé mak transfere husi FALINTIL mai iha forsa defeza,” nia koalia.
Iha tinan 2025, Timor Leste selebra aniversariu loron FALINTIL ba dala 50. FALINTIL nia espiritu rezistensia, disiplina, dezenvolvimentu iha tempu neeba kontinua sai lisaun diak ba forsa regular no too ohin loron sai FALINTIL – Forsa Defeza Timor Leste (F-FDTL).
Fundasaun Mahein (FM) nia observasaun parte husi F-FDTL nia lidera sira nee mai husi rezistensia FALINTIL.
“Daudaun nee iha tinan 50 aniversariu, ita koalia ona asuntu reforma setor seguransa no defeza. Entaun tuir Fundasaun Mahein nia haree, ita nia lideransa sira topu iha FALINTIL Forsa Defeza nian daudaun nee mai husi rezistensia FALINTIL,” nia afirma.
(jen)
