DILI, STLTIMORLESTE.com – Sekretariu Estadu Igualdade (SEI), Elvina Sousa Carvalho hatete, ezonera Visi Diretora Ezekutiva Servisu Rejistu no Verifikasaun Emprezarial (SERVE, I.P), nee kompetensia husi Visi Primeiru Ministru no Konselhu Ministru, maibe SEI nafatin hakbiit feto.
Sekretariu Estadu Igualidade (SEI), Elvina Sousa Carvalho hatoo kestaun nee ba jornalista sira iha nia knaar fatin Kaikoli, Dili, Tersa nee (18/03/2025).
Nia hatete, Governu deside ezonera Agusta Antonia Gomes husi Kargu Visi Diretora ezekutiva SERVE, I.P nee kompetensia husi Visi Primeiru Ministru nomos husi Konselhu Ministru, maibe Governu liu husi SEI nafatin hakbiit feto atu foti desizaun.
“Desizaun neebe mak foti nee liu tiha ona, ita koalia kona-ba ezonerasaun hau hanoin iha organika nia nee define ona se mak nomeia no se mak ezonera, neebe ezonera ona nee kompetensia husi Visi Primeiru Ministru ou kompetensia husi Konselhu Ministru, maske ezonera maibe atu hatete deit SEI sei nafatin kontinua hakbiit feto sira, no ami nafatin halo advokasia atu feto sira nafatin hetan pozisaun no fatin neebe bele foti desizaun, tanba nee mak durante nee ita nafatin halo advokasia,” katak nia.
Elvina dehan, SEI nafatin halo advokasia no nafatin enkoraja feto sira oinsa mak bele hetan pozisaun ruma hodi foti desizaun iha kualker atividade.
“Ami nafatin halo advokasia ba feto sira, nunee feto sira nafatin hetan pozisaun ka fatin neebe mak bele foti desizaun ruma, tanba nee mak durante nee ita nafatin halo advokasia, no ita nafatin halo advokasia atu feto maluk sira tuur iha kargu no pozisaun sira neebe mak estratejiku hodi bele foti desizaun, ida nee ita nafatin halo advokasia,” katak nia.
Entretantu iha loron 7 fulan Marsu, Governu ezonera Agusta Antonia Gomes husi Kargu Visi Diretora Ezekutiva SERVE, I.P.
No projetu rezolusaun nee aprezenta husi Visi Primeiru Ministru no Ministru Koordenador Asuntu Ekonomiku, Francisco Kalbuady Lay, no antes nee Governu indika Agusta ba kargu Visi Diretora Ezekutiva SERVE I.P iha loron 22 fulan Maiu 2022, husi Visi Primeiru Ministru, Kalbuady Lay.
(eme)
