BAUKAU, STLTIMORLESTE.com – Instituisaun FALINTIL-Forsa Defeza Timor Leste (F-FDTL) apoiu nesesidade bazika ba Fundasaun Casa Esperansa Orfonatu (FCEO) iha Tualeku, Suku Bahu, Postu Baukau Vila, Munisipiu Baukau.
Tenente Koronel Valero Valente hateten, apoiu nesesidade bazika refere nuudar programa kontinuasaun husi selebrasaun loron FALINTIL ba dala 50 nian neebe selebra ona iha loron 20 Agosto tinan 2025, tanba nee fo apoiu nesesidade bazika ba sira neebe presiza liu liu ba labarik sira iha Orfonatu Tualeku.
“Ida nee kontinuasaun apoiu ita nia oan sira liu liu Orfonatu sira iha nee. Hau hatete katak uluk ita nia apa sira kaer kilat dehan Povu mak bee FALINTIL mak ikan, tanba ida nee komemora 50 anos ami hakbesik ba ita nia oan katak, FALINTIL nuunka dook husi sira,” hateten Valero ba jornalista sira hafoin distribui sasan nesesidade bazika ba labarik sira iha FCEO Tualeku, Baukau, Sesta (06/09/2025).
Nia sublina, apoiu nesesidade bazika ba labarik sira iha Orfonatu Tualeku nuudar Domin husi Forsa Defeza Timor Leste nian ba sira, tanba uluk iha tempu difisil nia laran povu mak bee no FALINTIL mak ikan, nunee FALINTIL neebe transforma ona ba Forsa Defeza Timor-Leste sei la husik nia povu lao mesak, maibe Forsa Defeza sempre akompanha liu husi tulun natoon sira.
Nunee husi apoiu nesesidade bazika neebe iha fo ba labarik sira iha Orfonatu Tualeku mak hanesan fos kilograma 25 hamutuk saka 50, supremi sedaap kaixa 28, masi-midar kilograma 50 saka 4, deho kaixa 4, mina tein litru 5 kaixa 6, susu been lata marka enak kaixa 5, cha kaixa 2, kafe kaixa 2, rinso kaixa 2, sabun kaixa 2, masin tein kaixa 2, pepsodent kaixa 1 no eskova nehan kaixa 1.
“Sasan sira nee la barak ida maibe fo han laos ba tempu ida naruk semana no fulan nian bele auguenta moris,” Valero fundamenta
Diretora FCEO Cesaltina de Carvalho Soares agradese ba apoiu refere, tanba la espera Forsa Defeza Timor-Leste iha inisiativa fo apoiu ba nesesidade baziku neebe sei sustenta labarik nain 24 nuudar oan kiak iha Orfonatu Tualeku.
“Nesesidade bazika neebe prepara hanesan fos mina rinso sabun no buat barak neebe ami simu agradese, hanesan ohin komadante koalia ba semana ida rua, maibe ba ami fulan tolu hanesan nee mos bele sufisiente hela tanba dua ikan lima ruting nee sempre mai ba ami han sei resin tanba ho fe Maromak sei aumeta,” katak Celestina
Reprezentante Prezidente Autoridade Munisipiu Baukau, Maria Josefa lori Autoridade Munisipiu nia naran agradese ba apoiu refere hodi sustenta nesesidade ba loron balun nian.
Entretantu labarik nain 24 kompostu feto 11 mane 13 idade husi 3-16 mai husi Munisipiu Baukau, Likisa, Lautem no Oe-Cusse neebe husi tipu moris familia divorsiu, kbiit laek no seluk tan.
Jornalista: Tomas Reis
Editora: Carme Ximenes
