F-FDTL Inaugura Ona Uma ba Familia Olinda Belo iha Baukau

BAUKAU, STLTIMORLESTE.com – FALINTIL-Forsa Defeza Timor Leste (F-FDTL) inaugura ona uma ba familia Olinda Belo iha Suku Tirilolo, Postu Administrativu Baukau Vila, Munisipiu Baukau.

Uma neebe entrega ba familia Olinda Belo konstrui husi F-FDTL ho valor orsamentu rihun US$ 15, kobre ba uma refere iha kuartu toba fatin 3, sala vizita 1, sala jantar 1, dapur no fatin sanitariu neebe prienxe ba anivesariu ezistensia FALINTIL ba dala 50 iha tinan 2025, neebe lansa fatuk dahuluk ba konstrusaun uma refere iha loron 01 Agostu 2025 no entrega iha loron 01 Fevereiru 2026.

Liu husi diskursu, reprezentante Xefe Estadu Maior Jeneral Forsa Armadas, Kapitaun Gaspar da Silva hateten, iha loron 01 Fevereiru 2026, F-FDTL inaugura uma hanesan ba benefisiariu iha Munisipiu Baukau, aleinde mos inaugura iha Aileu, neebe inaugurasaun refere laos inaugura deit infraestrutura fizika, maibe marka dignidade umana nian no enkarna vizaun Forsa Armada nian neebe modernu, komprende katak Defeza Nasional labele haketak husi seguransa umana nuudar misaun primaria F-FDTL nian defeza intranjizente ba soberania nian, komplementa iha aktu ida nee ho vokasaun ba servisu publika iha tempu paz, obra sira nee harii ho kosar no kompetensia teknika husi militar sira no materializa ho apoiu indispensavel husi Ministeriu Defeza, hatudu katak farda kamufladu mak simbolu protesaun no refuji ba sira neebe vulneravel.

“Ita fo onra no atualiza iha nee valor sagradu sira FALINTIL nian. Se uluk ita nia misaun mak atu liberta rai doben liu husi kilat, ohin loron ita nia misaun mos atu liberta ita nia maluk sidadaun sira husi solidariedade no enjinaria militar nian, konteksu muda ona, maibe prinsipiu servi povu sai nafatin ita nia bussola moral,” hateten Kapitanu Gaspar da Silva liu husi diskursu iha fatin seremonia inagurasaun uma iha Vila Nova Baukau, Domingo (01/02/2026).

Nia sublina, ida nee koomprensaun sivil no Militar nian halibur disiplina no kapasidade lojistika Forsa Armada nian ba nesesidade loloos populasaun nian, hametin lasu neebe labele kotu entre populasaun ho ninia instituisaun defeza.

“Ba pesoal militar sira hotu neebe halao servisu ida nee ita boot sira nia esforsu harii uma no hametin komfiansa ba instituisaun. Ita sei kontinua servisu ho rigor no umanizmu hodi garante katak, iha ita nia protesaun laiha ema ida mak ita husik hela ba kotuk,” katak Kapitanu Gaspar da Silva.

Iha fatin hanesan benefisiaria Olinda Belo sente kontente ho uma neebe parte F-FDTL konstrui no oferese ba nia ho familia sira, tanba durante nee moris iha uma kondisaun aat no la seguru, maibe liu husi apoiu nee bele ajuda ona hodi utiliza ba tinan naruk.

“Hau nia moris nee durante hili agua mamuk mak faan hodi haree hau nia oan sira ami nia uma mos ladiak, maibe agradese ba Estadu halo ona ami nia uma, maibe sei falta mak kama kulsaun seidauk iha laran,” Katak benefisiaria nee.

Nia agrasede ba Estadu Timor Leste liu husi F-FDTL konstrui ona uma dignu ba nia, maibe iha uma refere sei falta fasilidade, tanba nee nia husu Governu atu kompleta.

Enkuantu tuir Ministra Solidariedade Sosial no Inkluzaun Verónica das Dores katak, uma neebe F-FDTL konstrui ba familia Olinda Belo diak tebes, tanba ho valor orsamentu kiik, maibe uma refere dignu duni ba benefisiaria no rekoinhese parte Governu prezisa priense mobiliariu iha uma refere.

“Ita nia forsa militar sira halo tiha uma nee prezisa tenke priense iha laran, tanba sira iha osan rihun US$ 15 so para halo deit uma entaun iha laran prezisa kama, kulsaun meza kadeira no material ba kozinha, tanba nee sira konvida hau ohin mai haree ho matan ami mak sei kompleta,” Katak Verónica das Dores.

Entretantu iha seremonia inagurasaun nee hetan partisipasaun husi Autoridade Suku Kaibada, Tirilolo, Administrador Postu Baukau Vila, Prezidente Autoridade Munisipiu Baukau, Ministra Solidariedade Sosial no Inkluzaun inklui Forsa Defeza Timor Leste.

(tom)