BAUKAU, STLTIMORLESTE.com – Ekipa konjunta husi Institusaun FALINTIL – Forsa Defeza Timor Leste (F-FDTL) ho Ministeriu Saude (MS) durante loron 2 fo konsulta espesializada ba ema nain 540 iha Munisipiu Baukau.
Diretor Servisu Saude Munisipiu Baukau, Cristiano Cipriano Belo informa, relasiona komemorasaun loron FALINTIL ba dala 50, Instituisaun F-FDTL liu husi Komponente Terrestre Baukau servisu hamutuk ho MS liu husi Servisu Saude Munisipiu Baukau no ekipa husi Hospital Rejional Eduardo Ximenes implementa konsulta espesializada loron dahuluk iha Suku Samalari, Postu Administrativu Baukau Vila no loron daruak iha Suku Namanei, Postu Kelikai Antigu neebe hetan partisipasaun masimu husi komunidade sira iha suku 2 refere.
“Atividade nee ami halo kada Suku loron ida, Suku Samalari komunidade sira neebe partisipa iha konsulta espesializada nee total hamutuk 266, ba iha Suku Namanei nia komunidade neebe mai partisipa hamutuk 274,” informa Cristiano ba jornalista sira iha nia knaar fatin Tirilolo, Baukau, Sesta (08/08/2025).
Nia esplika, konsulta espesializada refere foku ba problema saude inan, ruin, matan, moras laran, Ema ho Defisiensia no moras seluk tan neebe ekipa konjunta atende kedas iha terenu, tanba ekipa realiza programa refere ho ekipamentus portable X-ray, aimoruk no seluk tan neebe nesesariu utiliza iha konsulta refere.
Nia sublina, atividade konsulta espesializada sei lao rutina bele akontese kada fulan, fulan tolu no fulan neen, maibe depende ba planu liu husi atividade Programa Integradu Saude identifika ona kazu moras sira iha nivel Suku hafoin ekipa tun fo konsulta espesializada ba komunidade sira.
“Atividade nee lori Saude hakbesik ba komunidade liu-liu iha area neebe rural tebes ho objetivu atu halo redusaun tranferensia kazu espesializada mai nivel aas iha Sentru Saude sira,” Cristiano akresenta.
Enkuantu dadus konsulta espesializada husi Suku 2 refere, parte Saude Munisipiu Baukau seidauk bele relata ba publiku, tanba daudaun sei iha faze elaborasaun.
(tom)
