BAUKAU, STLTIMORLESTE.com – FALINTIL – Forsa Defeza Timor-Leste (F-FDTL) hamutuk ho Polisia Nasional Timor-Leste (PNTL) halo operasaun konjunta atu asegura pas no estabilidade iha Munisipiu Baukau.
Segundu Komadante Komponente Terrestre Lanud Baukau, Tenente Koronel Arlindo da Silva “Loes” hateten, forsa tarefas konjunta mak integrasaun entre PNTL no F-FDTL hodi garante pas no estabilidade iha territoriu nasional, tanba iha Konstitusaun Republika Demokratika Timor-Leste (K-RDTL) artigu 146 no 147 difini papel no responsabilidade PNTL ho F-FDTL nian, mak liu husi diretiva konjunta neebe lidera husi Xefe Estadu Maior Jeneral Forsa Armadas no Komadante Jeral PNTL neebe apoiu husi Governu atu asegura pas no estabilidade iha territoriu nasional liu liu iha Munisipiu Baukau.
Nomos tuir dekretu lei numeru 23/2023 loron 31 Maiu estatutu organika F-FDTL objetivu atu reforsa kapasidade F-FDTL defende soberania, nasaun, seguransa nasional hodi proteje povu husi ameasa oin oin no dekretu lei numeru 43/2011 loron 21 Setembru asegura seguransa iha territoriu nasional.
“PNTL no F-FDTL prontu atu garante seguransa ba komunidade iha Munisipiu Baukau hodi selebra loron Finadu hanesan okaziaun relizioju neebe mak importante tebes ba komunidade Katolika Timor. Iha loron nee komunidade barak sei vizita semiteriu halo orasaun tanba nee husu Komadante ekipa nafatin halo koordenasaun ho Komando karik iha asidente ou insidente ruma prezisa atende lalais,” Tenente Koronel Arlindo hateten liu husi diskursu iha ambitu formatura segurasa ba loron finadu neebe realiza iha edifisiu Komando Polisia Munisipiu Baukau, Sesta (31/10/2025)
Nia husu F-FDTL no PNTL atu patrolhamentu movel ba fatin semiteriu sira hotu iha Postu Administrativu 8 neebe eziste iha Munisipiu Baukau no nafatin halo koordenasaun ba malu hodi prevene no atua insidente no asidente ruma ho profesional no kapasidade tuir lei haruka.
Komadante Komando Polisia Munisipiu Baukau, Superintendente João Sancho Pires informa, operasaun konjunta entre F-FDTL no PNTL, tanba hetan diretiva husi Governu no diretiva husi Komando F-FDTL no PNTL neebe implementa operasaun konjunta hahu husi eventu festeza Timor-Leste nia adezaun ba ASEAN no daudaun kontinua atu asegura situasaun iha loron finadu no eventu importante sira too tinan foun 2026.
“Tanba nee mak ohin ita iha fatin ida nee atu asegura ita nia misaun ba ema no propriedade neebe mak iha ita nia Munisipiu atu bele ajusta ita nia Forsa halao patrolha konjunta, se deit mak iha kraik la tuir regras neebe ita halo, halo impedimentu ita uza lei, ita mos respeita direitus umanus maibe ema labele koko ita, tanba nee forsa 2 asegura eventu sira nee lao diak,” João Sancho Pires komenta
Komadante Polisia Munisipiu Baukau nee argumentu, mezmu Komando husi parte 2 respeita direitus umanus, maibe atu asegura situasaun iha eventu finadu no seluk tan, tanba nee liu husi operasaun konjunta refere mak iha sidadaun balu tenta halo perturbasaun ordem publika forsa parte 2 sei atua tuir lei haruka.
Entretantu operasaun konjunta nee involve husi membru Polisia Komando Polisia Munisipiu Baukau, Batalhao Ordem Publiku no Forsa Defeza Timor-Leste husi Komponente Terrestre Lanud Baukau.
(alb)
