DILI, STLTIMORLESTE.com – FALINTIL – Forsa Defeza Timor Leste (F-FDTL) ho Ministériu Edukasaun (ME) no Instituto Ciência Saude (ICS) halao sensibilizasaun kona-ba saude reprodutiva ba estudantes sira iha Eskola Sekundariu Jeral (ESJ) FINANTIL.
Diretor Eskola Sekundariu Jeral FINANTIL, Aniceto Berlelo dehan, relasiona ho selebrasaun aniversariu F-FDTL ba dala 50, F-FDTL no ME desidi mai halo sensibilizasaun iha eskola nee.
“Ami sente orgulhu, tanba husi F-FDTL no ME desidi mai halo sensibilizasaun iha ami nian eskola, liu-liu sira nian programa ba aniversariu iha 20 Agostu 2025. Ita nian FALINTIL neebe mak uluk luta ba rai ida nee, tinan ida nee halo aniversariu ba 50, sira halao atividades hotu iha Timor laran tomak. Iha Dili sira hili mai iha eskola FINANTIL, tanba ida nee mak hanesan Diretor, estrutura no estudantes husi eskola ida nee ami sente orgulhu no priviléjiu ida mai ami, tanba ami nian estudantes neebe mak reprezenta hela programa ida husi F-FDTL, nee uluk ami nian estudantes,” afirma nia ba jornalista sira iha ESJ FINANTIL, Tersa (08/08/2025).
Nia dehan, estudantes balun deit mak partisipa iha atividades sensibilizasaun nee, tanba balun kontinua partisipa iha prosesu aprendizajen husi profesores sira.
Iha fatin hanesan, Alferis Salvador dos Santos, hanesan Adjuntu Diretor Saude Militar, neebe sai orador prinsipal dehan, tinan 50 nee hanesan tinan reflekta hodi hanoin hikas eroi sira. Sira uluk la eskola la hatene lee no hakerek, maibe tanba ho liafuan katak hakarak ukun rasik aan, balun soe hela fen no oan sira tenke mate. Agradese ba tinan 50 FALINTIL nee ema involve mos iha momentu 1975 mai husi ai laran eskola.
“Ami atu fahe netik informasaun oituan saida mak daudaun nee ami halo servisu, ita nian intensaun hamutuk iha nee agradese ba inisiativa neebe mak mai husi ICS halo, karik estudantes ninia papel nee saida, tenke estuda no aprende, ida nee mak importante mak estudantes haraik aan no respeita ema. Se ita sai husi uma mak sikat tudik signifika ema ruma iha liur mos sikat tudik ba ita,” katak nia.
(jen)
