BAUKAU, STLTIMORLESTE.com – FALINTIL-Forsa Defeza Timor Leste (F-FDTL) realiza retiru jerajional iha Komponente Forsa Terrestre (CFT – sigla português) Lanud Baukau, hodi prepara lideransa militar Timor Leste iha futuru.
“Atividade nee retiru para halo ba ofisiais superior sira ho objetivu prepara lideransa instituisaun F-FDTL ba futuru,” hateten Xefe Estadu Maior, Tenente Jeneral Falur Rate Laek ba jornalista sira iha CFT lanud Baukau, Tersa (15/04/2025).
Tuir Tenente Jeneral Falur Rate Laek katak, prepara lideransa atu lidera instituisaun F-FDTL iha futuru, ofisiais superior sira neebe antes nee Estadu Timor Leste prepara no orienta ba tuir formasaun iha rai liur nomos rai laran, liu-liu iha Institutu Defeza Nasional sufisiente ona, nunee liu husi retiru jerajional atu hafoun no rejenerese hodi hametin kultura edukasaun iha Instituisaun F-FDTL ba futuru.
Nia sublina, lideransa ba instituisaun F-FDTL iha futuru tenke konsiensia nuudar Timoroan hodi konsolida sai lideransa neebe forte no demokratika, tanba lideransa F-FDTL inisiu Timor ukun aan too ohin loron jere instituisaun F-FDTL husi esperiensia ai-laran nian.
“Neebe atividade halo konsensaun hodi intervenenti sira ema istoriador, intelektual sira mak mai halo aprezentasaun, neebe agora lideransa ba oin nee ita halo preparasaun ba transformasaun jerajional,” Katak Falur.
Ministru Defeza Kontra Almirante Donanciano Costa Gomes “Pedro Klamar Fuik” hateten, mudansa ba Komando F-FDTL iha futuru tenke konjuntura iha dominiu kultural no iha konhesimentu nunee bele halo dezisaun diak ba kualker relasaun kooperasaun
“Hau halo analiza ida nee, hau seidauk koalia kona-ba novo modalidade, tantu ida nee dala ruma simu oportunidade mak ita koalia,” hateten Ministru Defeza
Entretantu retiru jerajional nee partisipa husi ofisiais superior sira neebe fasilita materia husi Ministru Defeza Donanciano Costa Gomes no jurista Avelino Coelho.
(tom)
