DILI, STLTIMORLESTE.com – Komando FALINTIL-Forsa Defeza TImor Leste (F-FDTL) selebara aniversáriu Komponente Naval ba Dala XXIII ho tema “Naval Forte Tasi Seguru”, tanba nee husu militár sira tane aas nafatin prestíjiu FALINTIL nian.
Hatete Komandante Komponente Navál, Comodoro Hígino das Neves, “Super man” ba jornalista sira iha Naval Hera, Postu Administrativu Cristo Rei, Munisípiu Dili, Domingu (12/01/2025).
Comodoro husu nia membru militar sira atu tane aas nafatin prestíjiu ka valor sira husi Forsas Armadas ba Libertasaun Nasional Timor Leste (FALINTIL) nian, nunee bele morin nafatin hodi hatutan sira nian mehi.
“Hau hatoo hau nia enkorajamentu ida nee, iha diskursu serimonia selebrasaun aniversariu Komponente Naval nian ba dala XXIII ho tema “Navál Forte Tasi Seguru”, neebe ita realiza iha baze naval nian iha Hera, Postu Administrativu Cristo Rei, Munisípiu Dili,” dehan nia.
Nia esplika, loron Komponente Naval ba dala XXIII nee, loron ida neebe fo hanoin ba sira komponente naval, tanba selebra loron ida neebe iha kedas situasaun ida neebe mukit. Situasaun mukit tanba natureza ninia kondisoens, tanba nee mak sira selebra ho simples deit.
“Maibe ho prezensa husi partisipante hot- hotu nian iha eventu selebrasaun aniveráriu nee, fo motivasaun, enkorajamentu ba ita sira iha komponente naval, hodi bele halao sira nia knaar ho susesu, mezmu ho difikuldades oin-oin,” hatete Comodoro.
Maibe nia dehan, lori Komando Naval, agradese ba prezensa hot- hotu, liu-liu Komandantes Komponentes, komandantes Unidades neebe nunka husik komponente naval iha situasaun neebe susar, sira mobiliza nia ema hodi bele ajuda oinsa bele ultrapasa situasaun ida nee.
Tanba Asesores internasional nia apoiu, Autoridade Marítima Nasional liu husi Kapitaun Xefe ninia ema sira nee ninia apoiu hotu, hanesan komando navál, agradese uain ba hotu-hotu nia apoiu, bele selebra aniversariu komponente naval nian ba dala XXIII. Sira nia pasiensia, sira nia kapasidade organizativu lideransa bele organiza eventu ida nee bele simples, maibe sira bele realiza ohin loron.
Iha fatin hanesan, Xefe Estadu Maiór F-FDTL, Tenente Jenerál Domingos Raúl “Falur Rate Laek” husu militár sira hotu atu halo reflesaun. Komandante Falur dezeja ba nia militar sira hotu, tinan foun neebe nakonu ho saude, servisu makaas, fiar, domin no liu-liu esperansa.
Tanba iha loron dahuluk tinan nee nian, Komponente Naval simu inundasaun boot neebe estraga material no ekipamentu militar, nunee mos infraestrutura neebe presiza investimentu boot liu tan husi rekursus estadu nian, atu hetan ninia rekuperasaun.
Maibe akontesimentu ida nee koko sira nia abilidade atu atentu no preparadu, liu-liu militar sira nian abilidade atu monitoriza ameasas, dezafius no risku sira neebe bele mosu kualker momentu. Biar nunee, militár sira hatudu nafatin rezilensia no dedikasaun ba servisu no halo buat hotu neebe sira bele atu rekupera neineik militar sira hodi fila fali ba normalidade.
Nunee husu bá militár sira hotu nia serbí iha komponente naval no autoridade marítima nasional, funsionamentu husi marina no autoridade marítima nasional nian iha 24 oras nia laran.
(jen)
