BAUKAU, STLTIMORLESTE.com – Relasiona ho estudante nain 50 husi Pre-eskolar Santa Ursula no João Paulo Segundu iha Munisipiu Baukau la hetan direitu osan hamutuk US$ 840,00 ba Programa Merenda Eskolar faze segundu nian, tanba kestaun parte eskola fornese dadus estudante ba Servisu Munisipal Edukasaun Baukau tarde.
“Sim, segundu faze ba merenda eskolar ba Santa Ursula nia kauza tanba dadus primeiru atribui la hanesan dadus segundu sira haruka mai, entaun pedidu orsamentu nee ami bazeia ba dadus primeiru neebe sira haruka mai, orsamentu aprovadu tiha tama tiha banku eskola infoma alunus numeru aumenta, entaun ita la muda pedidu, maibe ita fo hatene sira jere tuir osan neebe iha, osan alunus neebe aumeta nee ita tau iha terseiru peridu fulan Julhu nee,” hateten Xefe Departamentu Parke Eskolar iha Servisu Munisipal Edukasaun Baukau, Sabino Arlindo Ximenes ba jornalista sira iha Vila Nova Baukau, Sesta (04/07/2025).
Nia esplika, dadus segundu parte eskola relata ba Servisu Munisipal Edukasaun Baukau husi Pre-eskolar Santa Ursula estudante nain 195 no Pre-eskolar João Paulo Segundu nain 95, maibe dadus primeiru kompostu eskola rua refere fornese deit dadus estudante atu asesu programa merenda eskolar iha faze segundu hamutuk nain 140, nunee orsamentu ba faze segundu aprovadu ho valor US$ 3,948.00, nunee direitu ba estudante nain 50 laiha.
Tuir dadus neebe iha, lo-loos faze segundu implementasaun merenda eskolar iha Ekipa Jestaun Programa Santa Ursula ezekuta orsamentu US$ 20,311 ba numeru estudante rejistu husi eskola haat kompostu pre-eskolar Santa Ursula, Pre-eskolar João Paulo Segundu, Eskola Ensinu Baziku Primeiru Segundu no Terseiru Siklu Santa Ursula Vila Nova no Ensinu Baziku Primeiru Segundu Siklu Al Amal Baukau, maibe alokasaun orsamentu too deit rihun US$ 19 resin no falta US$ 840,00, tanba naran estudante nain 50 parte eskola submete tarde, maibe direitu ba estudante nain 50 refere la lakon, tanba sei aloka hamutuk ho faze terseiru nian.
“Osan ba estudante nain 50 nee US$ 840,00 mak laiha, neebe sira nia direitu nee ita sei aumenta fali iha fulan Julhu ida nee,” Sabino Arlindo Ximenes akresenta.
Nia argumentu, loron efetivu 40 ba implementasaun programa merenda iha loron tolu ikus neebe EJP sira fornese deit sasoro ba estudante sira, laiha impkatu, tanba iha mata dalan programa merenda eskolar bele fo sopa ba estudante sira.
Liga asuntu parte eskola Santa Ursula submete dadus estudante benefisiariu ba programa merenda eskolar faze segundu nian ba Servisu Munisipal Edukasaun Baukau tarde, STL tenta konfirma parte eskola Santa Ursula, maibe portaun eskola taka.
Maibe tuir informasaun neebe STL simu husi WFP Baukau iha loron 04 Julhu nee parte eskola Santa Ursula no Servisu Munisipal Edukasaun Baukau koalia ona asuntu dadus estudante nain 50 neebe la hetan direitu, sei prosesu iha faze tuir mai.
(tom)
