DILI, STLTIMORLESTE.com – Sosiedade Sivil husi Asosiaun HAK konsidera falha jestaun iha Hospital Nasional Guido Vadares (HNGV) halo pesoal saude uza osan privadu sosa formalin sona mate isin iha mortuariu.
Tuir Visi Diretor Hak, Antonino de Limas katak, liga ho kazu pesoal saude neebe uza osan rasik sosa formalin hodi sona mate isin iha Mortuariu HNGV tanba falha iha jestaun.
Visi Diretor Hak, Antonino de Limas hatoo kestaun nee ba jornalista sira iha nia knaar fatin Farol, Kuarta nee (07/01/2026).
Nia hatete, kada tinan Governu sempre aloka orsamentu neebe boot ba kada ministeriu, liu-liu Ministeriu Saude maibe formalin neebe sona mate isin laiha, ida nee falha iha jestaun.
“Kestaun ida nee hau hanoin asuntu hospital nia, husi Parte HAK nia rasik tinan kotuk mos koalia beibeik asuntu nee, hau hanoin publiku barak mos preokupa, sei nafatin akontese hanesan nee signifika jestaun iha hospital la diak, tenke honestu hatete hanesan nee, karik Diretor iha HNGV mak la halao funsaun ho diak, funsaun iha planeamentu funsaun halo kontrolu iha hospital mak karik laiha kbiit atu halo ida nee, entaun kazu sira nee nafatin mosu,” dehan Visi Diretor Hak.
Visi Diretor Hak dehan, lo-loos kazu pesoal saude mak sosa fali formalin hodi sona mate isin iha mortuariu nee labele akontese hanesan nee, tanba kada tinan Governu aloka osan ba Ministeriu Saude.
“Se pesoal saude sira mak iha inisiativa halao ida nee signifika jestaun iha hospital nee lao la diak duni, kona-ba formalin nee buat ida kiik stok ba atendimentu lo-loos nee tenke iha hela deit, tanba ita koalia karik maluk sira ba halo atendimentu iha HNGV, sorte diak fila sorte aat iis kotu iha neeba, entau lo-loos nee formalin iha mortuariu nafatin iha, se laiha nee fila ba kestaun jestaun, ita husu ba Diretor Nasional HNGV atu haree asuntu sira hanesan nee ho diak, nunee labele prejudika mosu fali pesoal saude mak sosa fali formalin,” katak nia.
Nia hatutan, se pesoal saude mak foti inisiativa sosa fali formalin hodi sona mate isin iha mortuariu, ida nee imajen neebe mak la diak iha publiku, se Hospital Nasional mak akontese hanesan nee oinsa ho Postu Saude sira atendimentu dala ruma aat liu.
Jornalista: Emerenciana Pinto
