BAUKAU, STLTIMORLESTE.com – Selebrasaun ezistensia FALINTIL ba dala 50 ho tema habelar informasaun ba mundu no subtema FALINTIL identidade Nasional harii karakter Nasaun ida nian.
Deklarasaun nee husi Xefe Estadu Maior, FALINTIL Forsa Defeza Timor Leste (F-FDTL), Tenente Jeneral Domingos Raul Falur Rate Laek, neebe aprezenta iha seremonia selebrasaun loron FALINTIL ba dala 50, iha Munisipiu Baukau, Segunda (18/08/2025).
Selebrasaun ezistensia FALINTIL ba dala 50 formalmente akontese iha 20 Agostu hodi halibur malu laos reflete akontesementu pasadu, maibe atu hafoun valor sira neebe prezente no trasa lalaok ba futuru nian.
“Loron ohin apela ba memoria gratidaun no ba responsabilidade ba sira neebe luta no lakon iha funu laran, gratidaun ba sira neebe reziste no responsabilidade ba jerasaun sira neebe sei simu ersansa ba nasaun neebe ita harii ohin loron,” dehan Tenente Jeneral, Domingos Raul Falur Rate Laek.
Nia sublina, iha kontestu Timor-Leste nia luta ba auto determinasaun Fretilin mosu nuudar forsa politika save ba ukun rasik aan neebe hetan liu husi presaun no komflitu iha kolonial nia leten. Ho nunee kriasaun FALINTIL iha loron 20 Agostu 1975 katak, defeza ba povu Timor neebe prezisa organizasaun Militar neebe iha kapasidade atu proteje populasaun apoiu indepedensia no reziste agresaun esternu, liu liu hasoru poder sira neebe ameasa mehi ba libertasaun nasional.
Tanba FALINTIL nia kriasaun nuudar expresaun ida husi imperativu etiku, atu garante ba povu Timoroan nia direitu ba auto determinasaun indepedensia ho dignidade, iha tempu difisil rezistensia nia prisipiu metin sai elementu iha formasaun no konsolidasaun ba identidade Nasional.
Husi prisipiu sira nee restante direitu atu lori destinu rasik, disiplina no espiritu sakrifisiu no koletivu nuudar dalan ba presistensia dignidade umana nuudar valor absoluto unidade iha diversidade nuudar forsa koezaun sai ponte entre istoria ho Nasaun sira seluk.
“Iha subtema mak FALINTIL no identidade Nasional harii karakter Nasaun ida nian, ita afirma identidade laos monumentu imovel, maibe prosesu moris ida, karakter nasional hetan forma liu husi terus no susar kontinua forma ohin loron liu husi responsabilidade loro loron nian hanesan Governasaun servi eduka ,produz no tau matan,” Falur akresenta.
Nia afirma, FALINTIL hanorin sidadaun Timor Oan harii soberania ho responsabilidade katak, defende territoriu no independensia respeita direitu internasional haburas relasaun ho vizinhu neebe diak no la rende ba violensia oi oin, maibe disiplina dever ho rigorozu. FALINTIL servisu ho integridade tau interese publiku aas liu, bazeia ba mata dalan sira neebe mak realiza selebra loron FALINTIL ba dala 50.
Seremonia loron FALINTIL ba dala 50 iha Munisipiu Baukau nee, Ministra Solidariedade Sosial no Inkluzaun Veronica das Dores sai inspetor konsidera, seremonia refere importante ba FALINTIL neebe harii iha tinan 1975 no importante ba Povu Timor-Leste tomak atu hatene loron importante refere, tanba FALINTIL reziste iha tempu difisil nia laran too harii nasaun ida ba nia Povu no partisipa iha seremonia refere intruduz mensajen Prezidente da Republika nian ba sidadaun Timor Oan sira hotu.
“Entaun komemora nee laos ba FALINTIL deit maibe ba povu hotu hotu, ohin ita tenke orgulhu, tanba ita harii Nasaun ida neebe independente total, mensajen Prezidente nian mak prezisa pas estabilidade, jerasaun foun sira tenke banati tuir saida mak ita nia eroi sira harii hela,” katak Ministra Veronica das Dores.
(tom)
