DILI, STLTIMORLESTE.com – Tribunal Judisial Primera Instansia Dili halao julgamentu ba arguidu ho inisial JTL, tanba falsifika dokumentu.
Tuir akuzasaun neebe iha katak, iha tinan 2019 too tinan 2020 arguidu JTL nuudar ema neebe mak simu pensaun matebian JC, tanba tuir baze de dadus Komandante Libertasaun Nasional Timor Leste nian, arguidu nuudar oan rasik husi matebian JC.
Arguidu rasik hetan direitu ba pensaun, tuir pedidu no dokumentu sira neebe mak arguidu submete ba iha Diresaun Nasional Asuntu Kombatente Libertasaun Nasional TL, no iha dokumentu sira nee arguidu deklara katak, nuudar matebian JC nia oan rasik.
Iha baze dadus Asuntu Kombatente Libertasaun Nasional, arguidu inventa sertidaun Batizmu arguidu nian, ho nia aman mak matebian.
Maibe tuir dokumentu sertidaun atual neebe fo sai katak, arguidu nia aman ho naran L no inan naran D.
Bazeia ba dokumentu inventa sira neebe mak arguidu hatama ba iha Sekretariu Estadu Asuntu Kombatente Libertasaun Nasional, no hahu husi tinan 2009 too tinan 2020, arguidu benefisia tiha osan Estadu ho total US$ 33.180,00 kada fulan arguidu simu U$$ 230,00.
Konsekuensia husi arguidu nia hahalok nee, Estadu Timor Leste hetan prejuizu ho osan US$ 33.180,00.
Tanba nee, Ministeriu Publiku akuza arguidu komete krimi Burla Agravadu no Falsifikasaun Dokumentu ka anotasaun teknika.
Hatan ba akuzasaun neebe iha, arguidu deklara katak, momentu neeba arguidu ba haree naran neebe taka iha postu, arguidu nia naran mos iha, tanba nee mak arguidu mai tarata dokumentus.
Arguidu deklara, momentu neeba iha ema ida ho naran TS, neebe oras nee daudaun mate ona, mak tarata arguidu nia dokumentus. Arguidu la konhese letra, tanba nee husu ajuda TS mak tarata dokumentu.
No TS dehan ba arguidu katak, dokumentus tarata hotu ona ba loke deit konta bankaria hodi ba foti osan, tanba nee mak arguidu mos halo tuir.
Arguidu deklara, momentu osan foti primeiru, arguidu foti no entrega tomak ba iha TS, no osan foti segundu mak arguidu foin foti.
Arguidu mos rekonhese, nia aman lo-loos mak L, laos JC. Rona tiha arguidu, Tribunal adia ba loron seluk hodi rona sasin.
Audensia julgamentu nee prezide husi Juiz Koletivu, Fransisca Cabral, Jose Escurial, Afonso Carmona, Ministeriu Publiku reprezenta husi Prokurador Aderito Tilman, arguidu hetan asistensia legal husi Defensor Publiku.
(ter)
