DILI, STLTIMORLESTE.com – Tribunal Judisial Primeira Instansia Dili (TJPID) halao julgamentu ba krime falsifikasaun dokumentus neebe mak komete husi arguidu inisial PRS.
Tuir akuzasaun katak, iha loron 4 fulan Junhu tinan 2020, aman husi arguidu ida ho inisial JS kontinua halo akordu arendamentu ho sidadaun Xina ida ho inisial DC, ho durasaun tinan 8, neebe sei remata iha loron 4 fulan Junhu 2028.
Tuir deklarasaun husi arguidu neebe haktuir katak, nia aman JS hakotu iis iha Janeiru 2020.
Tribunal Distrital Dili, iha ninia desizaun aprendedu ho data 23 Dezembru 2021, halao tiha ona ezekusaun ho asistensia husi forsa publika.
Iha loron 16 fulan Fevereiru tinan 2022, tuku 3:00 lokraik, parte lezadu hetan kopia ida husi akordu aluga rai nian neebe mak arguidu nia aman halo ho DC, neebe mak falsu tanba asinatura husi advogadu RAM ema seluk falsifika ona, maibe arguidu kontinua uza hodi hetan benefisiu ba nia aan rasik.
Ho loron 4 Junhu 2020, tanba laos nia mak asina, Xefe Aldeia haktuir katak, uluk halo akordu arendamentu ba Xefe Aldeia no Xefe Suku neebe asina, maibe ida seluk tesi deit asinatura Xefe Aldeia no Xefe Suku nian, depois ba kontratu seluk no kopia tiha, no depois fahe fali ba Xinesa seluk neebe aluga rai nee hanesan.
Ho hahalok hanesan nee husi arguidu, negosiante Xineza nee kontinua halo pagamentu ba arguidu, nunee fo prejuizu ba arguidu.
Nunee arguidu nuudar autor aktu falsifikasaun dokumentu ka notasaun teknika, previstu no punidu iha artigu 305, husi Kodigu Penal.
Hatan ba akuzasaun nee, arguidu PRS deklara ba Tribunal katak, kona-ba falsifikasaun dokumentus nee, arguidu la iha konhesimentu tanba kontratu neebe mak arguidu halo ho negosiante Xineza nee laos arguidu mak halo, maibe nia aman mak kontratu ho empreza Xina hodi aluga rai.
Arguidu deklara, asinatura neebe mak iha arguidu la iha konhesimentu, tanba asinatura kontratu ba arendamentu rai nee arguidu nia inan aman mak halo kontratu nee, maibe inan aman matebian ona.
Arguidu deklara, too agora negosiante Xineza sei aluga hela rai, tanba kontratu seidauk remata. Arguidu nia inan aman mate ona, maibe kada tinan lezadu sira selu ba arguidu.
Iha audensia Julgamentu nee lezadu la marka prezensa dezde inisiu lezadu halo tratamentu iha nasaun Indonezia.
Sasin DC dehan, kontratu nee asina husi arguidu nia inan aman no kontratu nee foin dala ida.
Sasin deklara, osan neebe mak arendamentu ba rai nee kada tinan sira fo ba arguidu hamutuk US$ 3.500. Antes sasin asina kontratu nee, arguidu nia inan-aman asina hotu ona no prepara hotu.
Hafoin rona tiha deklarasaun husi arguidu no sasin, Tribunal deklara katak, falsifikasaun dokumentus nee laos arguidu mak asina no ema neebe mak falsifika asinatura nee iha akuzasaun la iha.
Nunee iha alegasaun Ministeriu Publiku deklara katak, ema neebe mak falsifika dokumentus nee nia naran la iha akuzasaun no arguidu lo-loos la iha akuzasaun, tanba nee husu Tribunal atu apresia ba deklarasaun.
No parte Defeza husu Tribunal atu buka justisa lo-loos.
Hafoin rona tiha parte sira nee, Tribunal muda fali ba iha loron 13 fulan Fevereiru tuku 10 rona desizaun.
Audensia Julgamentu nee prezide husi Juiza, Fransisca Cabral, Ministeriu Publiku reprezenta husi Prokurador Domingos Barreto no arguidu hetan asistensia legal husi Defensor Publiku nain ida.
(ter)
