DILI, STLTIMORLESTE.com – Tribunal Judisial Primeira Instansia Dili (TJPID) kontinua halao julgamentu ba kazu Falsifikasaun Dokumentus Veteranus neebe komete husi arguidu nain rua ho inisial DCB no JDJL.
Prosesu refere antes nee rona ona deklarasaun husi arguidu sira, tanba nee iha julgamentu kontinuasaun Tribunal rona deklarasaun husi sasin.
Iha sala julgamentu laran, sasin Nuno Verdial Carvalo husi Komisaun Omenajen deklara katak, nia la konhese arguidu sira, tuir regra ema neebe asesu ba pensaun martir nian mak nia ferik oan nia oan ka nia familia, maibe desizaun iha familia mak deside.
Sasin deklara, atu hetan pensaun tenke iha dokumentus sira hanesan BI, Eleitoral, deklarasaun suku, sertidaun kazamentu no deklarasaun sertidaun obitu mak foin bele hetan pensaun.
Sasin esplika, sira atribui pensaun iha tinan 2013, no sasin la iha konhesimentu kona-ba arguidu sira simu pensaun, maibe sira simu fali informasaun husi PSIK katak, arguidu sira neebe simu pensaun nee laos martires nia oan. Ho nunee sira ba verifika iha sistema, arguidu sira nia avo nia naran la hanesan ho martir neebe iha.
Sasin deklara tan, arguidu JdJL tuir lo-loos labele hetan ona osan pensaun husi martir nian, tanba nia rasik hetan ona ninian mos.
Nunee, arguidu DCB Komisaun verifika iha sistema laos martir nia oan rasik, tanba nee sira hapara tiha nia direitu pensaun.
Rona tiha sasin nia deklarasaun, Tribunal adia ba loron seluk hodi tama ba iha faze alegasaun.
Audensia julgamentu nee prezide husi Juiz koletivu, Julmira Auxiliadora, Ivan Patrocenio no juiz estajiariu nain ida, Ministeriu Publiku reprezenta husi Prokurador Domingos Barreto, no arguidu nain rua hetan asistensia legal husi Defensor Publiku nain rua, Diamantino Amaral no Cancio Freitas.
(ter)
