DILI, STLTIMORLESTE.com – Xefe Estadu Maior Jenerál FALINTIL-Forsa Defeza Timor-Leste (F-FDTL) Tenente-Jenerál, Domingos Raul “Falur Rate Laek” hateten, Ezersisiu CARAT 2025 laos deit hametin militar sira nia kapasidade, maibe hanesan lasu amizade hodi hametin Forsa Armada iha Timor Leste (TL) ho Estadus Unidus Amerika (EUA).
Liafuan nee hatoo husi Xefe Estadu Maior Jenerál FALINTIL-Forsa Defeza Timor-Leste (F-FDTL) Tenente-Jenerál, Domingos Raul “Falur Rate Laek” ba jornalista sira, hafoin halo abertura ba Ezersisiu CARAT 2025, iha Estadiu Munisipal Dili, Segunda (22/09/2025).
Iha abertura nee Xefe Estadu Maior Jenerál FALINTIL-Forsa Defeza Timor-Leste (F-FDTL) Tenente-Jenerál, Domingos Raul “Falur Rate Laek” dehan, Ezersisiu CARAT 2025 oportunidade ida atu dezenvolve kapasidade militar sira nian, fortalese no interabilidade, atu hametin lasu konfiansa entre forsa armada sira iha TL no EUA.
“Partisipantes sira hotu hau dezeja ezersisiu ida neebe produtivu, seguru loron lima, hametin laos deit iha ita nia kapasidade militar, maibe mos hanesan lasu amizade no respeitu ba malu entre ita nia nasaun sira,” dehan Falur.
Nunee, programa ida nee troka konhesimentu pratika diak sira entre militar TL no EUA hodi kontribui ba dezenvolvimentu profisional no instituisaun F-FDTL nian, parseria bilateral no valor sira neebe ita partilha relasaun entre TL no Amerika bazeia ba fundasaun solidu kona-ba respeitu ba malu kooperasaun no valor sira neebe komun.
Falur dehan, defeza kooperasaun bilateral traduz ona ba apoiu konstituente ba dezenvolventu kapasidade F-FDTL nian liu husi programa formasaun asistensia teknika no ezersisiu hanesan CARAT.
“Apoiu ida nee folin boot tebes hodi harii Forsa Defeza ho profisional, neebe iha kapasidade atu asegura seguransa no konstrui ba estabilidade rezional,” dehan nia.
Nunee husi ezersisiu ida nee TL reafirma ninia vizaun ba kompromisu ba vizaun ida nee no ninia vontade atu asumi responsabilidade aumenta ba neineik ba iha seguransa rejional.
Falur mos husu ba militar no FFDTL sira hotu neebe envolve iha ezersisiu CARAT 2025, aproveita didiak oportunidade uniku ida nee, ba aprendizajen no dezenvolvimentu profisional.
Nia mos hatoo agradesimentu klean ba Marina Estadus Unidus Amerika ba sira nia vontade atu fahe konhesimentu no esperiensia ba FFDTL sira nia prezensa iha TL nuudar sasin ida kona-ba parseria bilateral solidu no kompromisu ba seguransa estabilidade no rejional.
Jornalista: EST 1
Editor: Xisto Mendonça
