DILI, STLTIMORLESTE.com – Xefe Estadu Maior Jenerál FALINTIL-Forsa Defeza Timor Leste (F-FDTL), Tenente Jenerál Domingos Raul “Falur Rate Laek” halao serimonia isar Bandeira Nasionál semana dahuluk iha fulan Maiu nian.
Nia dehan, Instituisaun F-FDTL hamutuk ho Ministériu Defeza realiza serimonia isár Bandeira Nasional semana dahuluk fulan Maiu, iha Kuartel Jenerál, Fatuhada, Dili.
“Primeira semana ita halo parada hasae bandeira hodi reforsa ita nia sentimentu patriotizmu no nasionalizmu, liu-liu ita nia aten barani (bravura) atu servi ba instituisaun no ita nia rai, ita nia povu ho sentidu responsabilidade no preokupasaun no halao knaar sira nuudar ema profisional no ema treinadu, nafatin uza meius sira neebe iha no kuidadu ho uniforme no ekipamentu individual sira vale didiak, bainhira ita uza karik iha tempu no momentu oportunu sira, nee para ita hatudu imajen neebe diak ba iha forsa sira,” Xefe Estadu Maior Jenerál F-FDTL, Tenente Jenerál Domingos Raul “Falur Rate Laek” liu husi nia diskursu iha Kuartel Jenerál Fatuhada, Dili, Segunda (05/05/2025).
Nia esplika, kontinua alerta ba militar sira hotu, importante liu mantein ita nia espiritu prontidaun nasional, nafatin hatudu disiplina no ba komandante hotu-hotu iha eskalaun hotu tenke implementa dirativa sira suplementar ona neebe iha unidade no Komponente tenke funsiona kadeia Komando ho diak.
Entretantu serimonia nee Xefe Estadu Maior Jeneral F-FDTL, Tenente Jenerál Domingos Raul “Falur Rate Laek” hanesan inspetor serimonia husu ba Kuartel Jenerál ho Ministwriu Defeza nafatin kooperasaun servisu hamutuk.
(jen)
