DILI, STLTIMORLESTE.com – Prezidente Interinu Federasaun Futebol Timor Leste (FFTL) atual Xefe Estadu Maior Jeneral F-FDTL, Tenente Jeneral Domingos Raul Falur Rate Laek husu ba ema hotu hotu atu haluha odiu vingansa no dezenvolve futebol iha Timor Leste.
Nia dehan, hodi ezekutivu komite nia naran hakarak apela ba kongresista sira hotu katak, kongresu ba eleisaun Prezidente no membru ezekutivu sira hodi kompleta estrutura atual iha loron 11 fulan Janeiru tinan 2025 bazeia ba rekomendasaun husi FIFA no AFC.
“Hau lori autoridade no moral neebe mak iha hakarak hatete sai ba ita boot sira katak, hau simu ita boot sira nia komentariu no aspirasaun no dezeju, hau hatete ba ita boot sira agora tempu soberanu ba bola,” dehan Falur liu husi nia intervensaun iha ambitu kongresu estraordinariu hili komite Independente, iha Otel Novu Turizmu Dili, Sabadu nee (26/10/2024).
Ho nunee nia husu kongresista sira haluha diverzensia, kontradisoens, no mos odiu vingansa sira, rekonsilia imi nia pozisaun atu hola desizaun agora kedas para bola nee lao ba oin. Haluha tiha komentariu sira iha liur, haluha tiha kritika sira iha liur.
Enkuantu iha ambitu hili komite Independente hetan votu afavor 17 husi Assosiasaun Futebol no mos klubu kampiaun la liga futebol Timor Leste.
Nunee mos iha ambitu kongresu nia laran, Prezidente Interinu Federasaun Futebol Timor Leste atual Xefe Estadu Maior Jeneral F-FDTL, Tenente Jeneral Domingos Raul Falur Rate Laek fo orientasaun ba Polisia Militar sira hodi duni sai Prezidente Assosiasaun Futebol Dili Leste husi kongresu hafoin nia atu hatoo nia intervensaun iha kongresu estraordinariu FFTL.
(mar)
